നിങ്ങള് അറിയുന്ന ശ്രീനാരായണഗുരു
-
1. നവോത്ഥാനനായകന് ആയിരുന്ന ശ്രീനാരായണഗുരു ജനിച്ച വര്ഷം ?
1856 ആഗസ്റ്റ് 20 (കൊല്ലവര്ഷം 1032 ചിങ്ങമാസം ചതയം നക്ഷത്രം)
ചെമ്പഴന്തി (ഈഴവ സമുദായ...
യോഗ യോഗം എന്നൊക്കെ പറഞ്ഞാല് കൂടിച്ചേരല് എന്നാണു അര്ത്ഥം. ഇംഗ്ലീഷ് ഭാഷയില് UNION എന്നുള്ള വാക്കിനു എന്താണോ അര്ത്ഥം അത് തന്നെയാണ് യോഗയുടെ അര്ത്ഥവും.
സനാതന ധര്മ്മം അനുസരിച്ച് ആത്മാവും (Consciousness) പരമാത്മാവും (Universal Consciousness) ഒന്നാണ് എങ്കില് കൂടി ശരീരമാകുന്ന ഉപാധി നിമിത്തം ഇത് രണ്ടായി കാണപ്പെടുന്നു; അഥവാ തോന്നുന്നു. മനസ്സിനെ നിയന്ത്രിച്ച് ബുദ്ധിയെ ഏകാഗ്രമാക്കി "ഞാന്" എന്നുള്ള ശരീര ബോധത്തെ പ്രപഞ്ചം മുഴുവന് നിറഞ്ഞു വിലസുന്ന പരമാത്മബോധത്തില് ലയിപ്പിച്ച് അഥവാ വിലയം പ്രാപിച്ച് ബ്രഹ്മത്തെ അറിഞ്ഞു ബ്രഹ്മമായി തീരുവാന് (To merge with universal consciousness) പഠിപ്പിക്കുന്ന ഒരു ഉപാസനാമാര്ഗ്ഗം ആണ് യോഗാഭ്യാസം. അങ്ങിനെ "സമ ധീ" ആയവന് ജനന മരണ ചക്രങ്ങളില് നിന്നും മോചനം നേടുന്നു, അല്ലാത്തവര് വീണ്ടും വീണ്ടും ജനിച്ച് മരിക്കുന്നു. സന്യാസിമാരുടെയും യോഗികളുടെയും ദേഹ വിയോഗത്തെ "സമ ധീ" എന്ന് പറയുവാനും കാരണം ഇത് തന്നെ.
സെമിറ്റിക് മതങ്ങളെ സംബന്ധിച്ച് സത്യത്തില് ഇങ്ങനെയുള്ള കാര്യങ്ങള് വരുന്നില്ല. മറിച്ച് മരിച്ചാല് മണ്ണിനടിയില് തന്നെ കിടക്കുമെന്നും; അന്ത്യവിധി നാളില് ദൈവം എല്ലാവരെയും വിളിച്ച് അര്ഹതപ്പെട്ടവര്ക്ക് സ്വര്ഗ്ഗവും നരകവും നല്കും എന്നുമാണ് വിശ്വാസം.
പറഞ്ഞു വന്നത് ഒരു സെമിറ്റിക് മതവിശ്വാസിയെ കൊണ്ട് നിര്ബന്ധിച്ച് യോഗ ചെയ്യിപ്പിക്കുന്നത് അവരെ മതം മാറ്റുന്നതിന് തുല്യമാണ്. അങ്ങിനെ മതം മാറ്റത്തിന് ചതിയിലൂടെ നേതൃത്വം നല്കുകയാണ് ഇപ്പോള് സത്യത്തില് "ചാതുര് വര്ണ്ണ്യ നിയന്ത്രിത കമ്മ്യൂണിസ്റ്റ് പാര്ട്ടി" ചെയ്യുന്നത്. യോഗ മതേതരം അല്ല...! സംശയം ഉള്ളവര് പതഞ്ജലി മഹര്ഷിയുടെ യോഗസൂത്രം വായിക്കുക...!
പിന്നെ വിദേശികള് യോഗയെ അംഗീകരിക്കുവാന് ഉള്ള പ്രധാന കാരണം; അവര് കാര്യങ്ങളെ ശാസ്ത്രീയമായി അറിയാന് തുടങ്ങിയപ്പോള് ആകാശത്തില് ഇരിക്കുന്ന ഒരു ദൈവം എന്നുള്ള കാഴ്ചപ്പാട് ഉപേക്ഷിച്ചു എന്നതാണ്. അവര് Universal Consciousness എന്നതിനെ അംഗീകരിക്കുന്നു എന്നതിനാല് ആണ് യോഗയെ അവര് രണ്ടു കയ്യും നീട്ടി സ്വീകരിക്കാന് ഉള്ള പ്രധാന കാരണം...!
യോഗ എന്നാല് തലകുത്തിയും കാലുകള് അകത്തിയും ഒടിഞ്ഞും വളഞ്ഞും തിരിഞ്ഞും നില്ക്കല് ആണെന്ന് കരുതി ജീവിക്കുന്ന അന്തംകമ്മികള് ഇതൊക്കെ എന്നറിയാന്...? ഒരു ഭാഗത്ത് മനുഷ്യര് പട്ടിണി കിടന്നു മരിക്കുമ്പോള് കല്ലിനെ ഈശ്വരന്റെ പേര് വിളിച്ച് അതിനെ പാല് ഒഴിച്ച് കഴുകി നിര്വൃതി അടയുന്ന അന്ധവിശ്വാസികള് ആയ ഹിന്ദുക്കളുടെ കാര്യവും തഥൈവ...!
|
|
Posted: 17 Jul 2016 07:43 AM PDT
"ഹിന്ദുമതം" എന്നതു് വിദേശികളുടെ ഭാരതത്തിന്റെ ദാർശനികതയെക്കുറിച്ചുള്ള അറിവില്ലായ്മയും ഭാരതീയ ഭാഷകളെക്കുറിച്ചുള്ള അറിവില്ലായ്മയും, ആ ഭാഷകൾ ശരിയായി ഉച്ചരിക്കാനും മനസ്സിലാക്കുവാനും ഉള്ള കഴിവുകേടും ചേർന്നുണ്ടാക്കിയ ഒരു തെറ്റാണു്. ഇതു് തെറ്റെന്നതിലും കൂടുതലായി മനഃപൂർവ്വമായി ചെയ്താണുന്നതാണു വാസ്ഥവം. അതിനെ എതിർത്തില്ലാ എന്ന തെറ്റു് ഭാരതീയരായ നമ്മുടെ പൂർവ്വികരുടേതു തന്നെ. കൂടാതെ അതിനെത്തന്നെ ഖണ്ഡങ്ങളാക്കി, ബുദ്ധമതം, ജൈനമതം, ശൈവമതം, ശക്തി മതം, വൈഷ്ണവമതം എന്നെല്ലാം പേരുകൾ നല്കിയതിനെയും എതിർത്തില്ല എന്നതും നമ്മുടെ പൂർവ്വികരുടെ മറ്റൊരു തെറ്റ്. ആ തെറ്റുകളെയെല്ലാം അംഗീകരിക്കുകയും അവയ്ക്കനുസരിച്ചു് ആത്മീയതയെ തരം താഴ്ത്തി അവയ്ക്കനുസരിച്ചു് മറ്റഹ്ങ്ങളുടെ പട്ടികയിലാക്കി. അതിനെ നമ്മുടെ പൂർവ്വികർ എതിർ ത്തില്ല. തന്നെയുമല്ല, അവർ അതു സ്വയം പ്ർഖ്യാപിച്ചു നടക്കുകയും ചെയ്യുന്നു.
ഇപ്പോൾ ഗുരുദേവനെയും അതേ വഴിക്കു (അവരവരുടെ മതത്തിലേക്കും ജാതിയിലേക്കും) കൊണ്ടു പേകയാണു, ഗുരുദേവൻ ഹിന്ദു സന്യാസിയാണെന്നും അല്ലെന്നും ഈഴവനാണെന്നും അല്ലെന്നു വാദിച്ചക്കുന്നവർ ചെയ്യുന്നതു്. ഗുരുദേവൻ ആരുടെയും സ്വകാര്യസ്വത്തല്ല. ദയവായി അങ്ങനെയാക്കാൻ ശ്രമിക്കാതെ ഇരിക്കുവാൻ അപേക്ഷിക്കുന്നു. ചിലരുടെ പ്രവർത്തികൾ ജീവിച്ചിരുന്നപ്പോൾ തന്നെ ഗുരുദേവനെ ക്കൊണ്ടു് "നാം ജാതി ഉപേക്ഷിച്ചു" എന്നു പറയിപ്പിക്കുക തന്നെ ഉണ്ടായി.
ഗുരുദേവനെ ആദരിക്കുകയും ആ ദർശനങ്ങളെ സ്വന്തം ജീവിതത്തിൽ പ്രായോഗികമാക്കുകയും ചെയ്യുന്ന കുറെ മനുഷ്യരെ നേരിട്ടറിയാനുള്ള ഭാഗ്യം ലഭിച്ചതിൽ ഞാൻ സന്തോഷിക്കുന്നു. എന്നാൽ ഇന്നു കാണുന്ന ശ്രീനാരായണകൂട്ടായ്മകളിലല്ല അവരെ കണ്ടതെന്നതിൽ അല്പം വിഷമവും ഇല്ലാതില്ല. ആ കൂട്ടായ്മകളിൽ വളരെ പരിമിതമായ തോതിലെ ആങ്ങനെയുള്ളവരെ കാണാൻ സാധിച്ചുള്ളൂ. ഗുരുദേവൻ മതം സ്ഥാപിച്ചു എന്നു പോലും പ്രസംഗിച്ചും എഴുതിയും നടക്കുന്നവരും ഉണ്ട്. അവരോടു സഹതപിക്കയല്ലാതെ എന്തു ചെയ്യാൻ പറ്റും?
ഈ തെറ്റുകളെയെല്ലാം തിരുത്തേണ്ട സമയം ആയി. അതിനെ എതിർ ക്കേണ്ടതും അത്യാവശ്യം ആയിരിക്കുന്നു. ഭാരതത്തിന്റെ ആത്മീയതയുടെ കുത്തകക്കാർ എന്നു സ്വയം നടിച്ചു് നടക്കയും അങ്ങനെതന്നെ എന്നു വളരെപ്പേർ സമ്മതിച്ചു കൊടുക്കുകയും ചെയ്തിട്ടുള്ള സംഘടനകളും സാമൂഹ്യ-സാംസ്കാരിക ആത്മീയ നേതാക്കളും ഇനിയെങ്കിലും
'ഹിന്ദുത്വത്തെ'യും 'ഹിന്ദുമതം മറ്റുള്ളമതങ്ങൾ പോലെയല്ല' എന്ന വാദത്തേയും വിട്ടിട്ട്; 'ഞങ്ങളുടേതു ഒരു വെറും മതമല്ലാ, ഈ സനാതനമായ ധർമ്മം, ജീവാത്മാ-പരമാത്മ ഏകോപനമായ മോക്ഷപ്രാപ്തിക്കുള്ള ഏക മാർഗ്ഗം ആണെന്നും, ഇതു മതങ്ങൾക്കെല്ലാം അതീതമായ അദ്ധ്യാത്മജ്ഞാനത്തിന്റെയും വിജ്ഞാനത്തിന്റെയും ശാസ്ത്രം ആണെന്നു ഉദ്ഘോഷിക്കേണ്ട സമയം ആയിരിക്കുന്നു. അതിനവർക്കു സാധിക്കും എന്നു ആഗ്രഹിക്കുന്നു. സാധിക്കും എന്നു വിശ്വസിക്കുന്നു.
ഭാരതത്തിന്റെ ആത്മീയത; സനാതനമായ ഈ ധർമ്മം വെറും ഒരു മതതത്വമോ വിശ്വാസമോ അല്ല. അഹന്തയോടു കൂടിയോ അല്ലാതെയോ അടിച്ചേല്പിക്കേണ്ട ഒന്നല്ല. ഇതു് മതങ്ങൾക്കെല്ലാം അതീതമായ ഒരു ശാസ്ത്രം ആണു്. സനാതനമായ ധർമ്മം. ഇതു ആദിയും അന്തവും ഇല്ലാത്ത ആത്മീയജ്ഞാനത്തിന്റെ ശാസ്ത്രം ആണു്. ജനനനവും മരണവും ഇല്ലാത്തതും ആയ ബ്രഹ്മത്തിന്റെ ശാസ്ത്രം ആണു്, അത്മാവിന്റെ ശാസ്ത്രം, അതീതമായ സത്യത്തിന്റെ ശാസ്ത്രം, ജീവാത്മാവിനും പരമാത്മാവിനും തമ്മിലുള്ള ഏകത്വത്തിന്റെ ശാസ്ത്രവും ആണിതു്. ഇതിനെ മനസ്സിലാക്കുന്നവർക്കു് അനന്തമായ ആത്മീയ സംതൃപ്തിയും ആത്മസം യമനവും ലഭിക്കും.
അത്മാർത്ഥമായ അനുഷ്ടാനത്തോടുകൂടി ഇതിനെ പരിപാലിക്കുന്നവർക്കു് ഇതു വഴങ്ങും. അത്മീയവും പൻചഭൂതാത്മകവും ആയ് ആനന്ദവും ലഭിക്കും. എല്ലാവർക്കും ഉല്കൃഷ്ടജീവിതം നയിക്കാൻ, സകലത്തിനും ഉപരിയായി ഉപയോഗിക്കാവുന്ന സനാതനമായ് ഈ ധർമ്മം. ഇതു സ്വർഗ്ഗരാജ്യത്തേക്കുള്ള ഒറ്റയടിപ്പാതയല്ല. മറിച്ചു് ഇതൊരു ബഹുമുഖമായ രാജ വീഥിയാണു്. ജീവാത്മാവിനും പരമാത്മാവിനും തമ്മിലുൾല ലയനത്തിന്റെ ശാസ്ത്രം ആണിതു്. ആ ലയനമാണു് മോക്ഷം. അതാണു് എല്ലാ ജീവാത്മാക്കളുടെയും അന്തിമ ലക്ഷ്യം. ഇതിനു സമാനമായി മറ്റൊന്നില്ല. ഇതു മാത്രമേ ഉള്ളൂ. ഇതിനെ അളക്കുവാനുള്ള അളവുകോലും എങ്ങും കിട്ടില്ല. മതങ്ങൾ കടലോരത്തെ പൂഴിമണലിൽ കുട്ടികൾ ജലക്രീഡയ്ക്കായി ഉണ്ടാക്കിയ കുഴികളിൽ കുട്ടികൾക്കു് കളിക്കാനായുള്ള ജലമാണെങ്കിൽ, ഇതു് ആ ജലം അനവരതം നല്കിയതും നല്കിക്കൊണ്ടിരിക്കുന്നതും, ഭാവിയിലും നല്കാൻ കഴിവുള്ളതുമായ അനന്തമായ മഹാസാഗരവും ആണിതെന്ന സത്യം ഓർക്കുക.
മഹാത്മാക്കളുടെ സംഭാവനകളാൽ ഇതു സദാ പുഷ്ടിപ്പെട്ടു കൊണ്ടിരിക്കുന്നു. വേദങ്ങളിൽ അധിഷ്ഠിതമായ ഈ സനാതനമായ ധർമ്മത്തിന്റെ പാരമ്മ്യമാണു് വേദാന്തം അഥവ ഉപനിഷത്തുക്കൾ. അജ്ഞരും സംസാരബന്ധങ്ങളാൽ ദു:ഖിതരും ആയ ജീവാത്മാക്കളെ, ജ്ഞാനവിജ്ഞാനങ്ങളേകി മുക്തരാക്കുകയാണു് വേദാന്തത്തിന്റെ ലക്ഷ്യം. വേദാന്തം ജീവാത്മാവിനെ ബ്രഹ്മത്തിന്റെ പരാ-അപരാ പ്രകൃതികളെ തിരിച്ചറിഞ്ഞ്, പരാപ്രകൃതിയുമായി താദാത്മ്യം പ്രാപിച്ചു സ്വതന്ത്രമായി, സുഖസമ്പന്നമായി അപരാപ്രകൃതിയിൽ വിഹരിക്കുന്നതിനു കഴിവുള്ളതാക്കിത്തീർക്കും. ഇതു മറ്റെങ്ങും ലഭ്യമല്ല. ഇതിനു ബ്രഹ്മവിദ്യ എന്നും പറയും. നമ്മിൽ ബ്രഹ്മവിദ്യ അതിന്റെ പാരമ്മ്യതയിൽ എത്തുമ്പോൾ നാമെല്ലം ഒന്നാണെന്ന ബോധം ഉണ്ടാകും. അവിടെ എല്ലാവിധമായ സമത്വവും സാഹോദര്യവും വിളയാടും. ജനങ്ങൾ എല്ലാം തന്നെ ഒരേ വംശജരാണെന്നും അവിടെ ഉച്ചനീചത്വങ്ങൾ പാടില്ലാ എന്നും മനസ്സിലാകും. ഇതു ബ്രഹ്മവിദ്യയാണു്.
ബ്രഹ്മവിദ്യ അതിന്റെ പാരമ്മ്യതയിൽ എത്തുമ്പോൾ നാമെല്ലം ഒന്നാണെന്ന ബോധം ഉണ്ടാകും. അവിടെ എല്ലാവിധമായ സമത്വവും സാഹോദര്യവും വിളയാടും. ഞാൻ പ്രായോഗികമാക്കാൻ ശ്രമിക്കുന്നതു ഈ ബ്രഹ്മവിദ്യയാണു്.
ഇതു "ഹിന്ദുമതം" അല്ല. അപ്പോൾ ഇതൊരു മതമേ അല്ല. ഗുരുദേവൻ ഒരു ബ്രഹ്മവിദ്യാ വിചക്ഷണനായിരിന്നു. അപ്പോൾ ഗുരുദേവനും ഹിന്ദുവല്ല. "ഹിന്ദുമതം" എന്നൊന്നില്ലാ എന്നും ഗുരുദേവൻ വളരെ വ്യക്തമായി ത്തന്നെ പറഞ്ഞിട്ടും ഉണ്ട്.
ആനന്ദോഹമഹം ബ്രഹ്മാ- ത്മാഹമസ്മീതി രൂപതഃ ഭാവനാ സതതം യസ്യ സ ഭക്തി ഇതി വിശ്രുതഃ ഇതു ഗുരുദേവന്റെ വാക്കുകളാണു്. ഞാൻ ആനന്ദമാകുന്നു. ആത്മാവാകുന്നു എന്നുള്ള രൂപത്തിൽ യാതൊരുവനു് എല്ലായ്പ്പോഴും ഭാവനയുണ്ടോ അവൻ തന്നെ ഭക്തനെന്നു വിശ്രുതനാകുന്നു എന്നാണിതിനർത്ഥം.
"ആനന്ദത്തെത്തന്നെ ബ്രഹ്മമെന്നു ധ്യാനിക്കുന്നതാണു് നാരായണഗൂരുവിന്റെ ഏക ദൈവം; ആനന്ദത്തെത്തന്നെ ആത്മാവെന്നറിയുന്നതാണു് നാരായണഗുരുവിന്റെ ഏകജാതി. എല്ലാവിധത്തിലും സരവ്വതിരക്തമായിരിക്കുന്നതും എല്ലാവിധത്തിലും സന്നികൃഷ്ടമായിരിക്കുന്നതും ആയ ആനന്ദം തന്നെയാണു് ജീവിതവും. ജീവിതത്തിന്റെ അർത്തവും ലക്ഷ്യവും എന്തു എന്നറിയുന്നതാണു് നാരായണഗുരുവിന്റെ ഏകമതം." "ഹിന്ദുമതവും" "ബുദ്ധമതവും" കൃസ്തുമതവും ഒന്നുമല്ല ആ ഏക മതം. ഈഴവനും നായരും നമ്പൂതിരിയും ഒന്നുമല്ല ഗുരുദേവൻ പറഞ്ഞ ഏക ജാതി; ക്രിസ്തുവും അള്ളായും ശ്രീരാമനും ശ്രീകൃഷണനും ഒന്നുമല്ല ആ ഏക ദൈവം.
"ത്വം ഹി ബ്രഹ്മ ന ചേന്ദ്രിയാണി ന മനോ ബുദ്ധിര്ന്ന ചിത്തം വപുഃ പ്രാണാഹങ്കൃതയോന്യദപ്യസദവിദ്യാകല്പിതം സ്വാത്മനി സര്വ്വം ദൃശ്യതയാ ജഡം ജഗദിദം ത്വത്തഃ പരം നാന്യതോ ജാതം ന സ്വതഏവ ഭാതി മൃഗതൃഷ്ണാഭം ദരീദൃശ്യതാം." - ഇതും ഗുരുദേവനാൽ വിരചിതമായതാണു്.
നീ ബ്രഹ്മം തന്നെയാണു്; ഇന്ദ്രീയങ്ങളല്ല, മനസ്സുമല്ല, ബുദ്ധിയും അല്ല, ചിത്തവും ശരീരവും അല്ല. മറ്റു പ്രാണൻ അഹങ്കാരം മുതലായവയും ഇല്ലാത്തവയാണു്;. (അവയെല്ലാം തന്നെ) സ്വ-രൂപമായ ആത്മാവിൽ അവിദ്യാകല്പിതങ്ങൾ മാത്രം ആണു്. ഈ സകല ജഗത്തും ദൃശ്യമായിരിക്കുന്നു എന്നതിനാൽതന്നെ ജടമാണു്. അവ നിന്നിൽ നിന്നും വേറിട്ടു് മറ്റൊന്നിൽ നിന്നും ഉണ്ടായതും അല്ല. എന്നാൽ അവ സ്വയം പ്രകാശിക്കുന്നവയും അല്ല; പിന്നെയോ അവ മരുഭൂമിയിൽ ഉണ്ടെന്നു തോന്നപ്പെടുന്ന, കാനൽജലം പോലെയാണെന്ന സത്യം ചിന്തിച്ചറിയുക. ബ്രഹ്മം, അതായതു് ആത്മാവു്, അതൊനുമാത്രം ആണുള്ളതു്. അതാണു് ഈ അഘിലാണ്ഡമെല്ലാം തന്നെ - ശുദ്ധബോധം; ശിവോഹം, ശിവോഹം ശിവോഹം. ഇതു് അമ്പലങ്ങളിൽ പൂജിക്കപ്പെടുന്ന ശിവനും അല്ല. ആനന്ദം, ആനന്ദം, ആനന്ദം മാത്രം ആണതു്.
|
|
Posted: 17 Jul 2016 07:37 AM PDT
ശ്രീനാരായണഗുരുവിന്റെ ഈ മഹനീയ വിളംബരത്തെ ഉള്ഘോഷിച്ചു കൊണ്ട് ഗുരുദേവവിശ്വാസികള് ആഘോഷങ്ങള് നടത്തുമ്പോഴും അതിനിടെ ചില ഭിന്നസ്വരങ്ങളും ഞാനീയിടെ കേള്ക്കുകയുണ്ടായി. അതില് അധികാരമോഹങ്ങലോടെ ഗുരുദേവനെ കാവിയണിയിച്ചു ഒരുപകരണമായി കൂടെ നിറുത്താന് ശ്രമിച്ചവരും ശ്വാസ-നിശ്വാസങ്ങളില്പ്പോലും ഗുരുദേവനെ സ്വന്തം ദൈവമായി കൊണ്ടുനടക്കുന്നതായി അവകാശപ്പെടുന്നവരും അടുത്തകാലത്തായി ജാതിസ്നേഹം മൂത്തുപോയി ഇവരുടെ താങ്ങുകാരായി മാറിയ ചിലരുമൊക്കെയുണ്ട്.അവരുടെയൊക്കെ വാദഗതിക്കുപോല്ബലമായി ജന്മഭൂമി ദിനപ്പത്രത്തില് വന്ന ഒരു ലേഖനവും അതിനെക്കുറിച്ച് നമ്മുടെ ബിനു കേശവനും മറ്റുചിലരും വ്യത്യസ്തസ്വരങ്ങളിലൂടെ എഴുതിയ പോസ്റ്റുകളുമാണ് എന്റെ ഈ ലേഖനത്തിനാധാരം. ശ്രീമാന്മാര് കോട്ടുകോയിക്കല് വേലായുധന്റെയും മൂര്ക്കോത്ത് കുമാരന്റെയും ഗുരുദേവജീവിതചരിത്രങ്ങളാണ് ഇവരുടെ വാദഗതികള്ക്ക് കൂട്ടുപിടിച്ചിട്ടുള്ളത്.
ചെങ്ങന്നൂരിനടുത്ത് കണിക്കുറുപ്പന്മാരെന്നു (പിച്ചനാട്ടു കുറുപ്പെന്നും ഇവരെ വിളിച്ചിരുന്നതായി മൂര്ക്കോത്ത് കുമാരന്റെ പുസ്തകത്തില് രേഖപ്പെടുത്തിയിട്ടുണ്ട്) അറിയപ്പെട്ടിരുന്ന ഒരു സമുദായക്കാര് അന്നുണ്ടായിരുന്നു. ചില കാര്യങ്ങളിളൊക്കെ ഈഴവര്ക്ക് ഉണ്ടായിരുന്നതിനെക്കാളും കൂടുതല് സ്വീകാര്യത (അയിത്തമില്ലായ്മ) ഇക്കൂട്ടര്ക്ക് സവര്ണ്ണരില് നിന്നും ഉണ്ടായിരുന്നെങ്കിലും ആ ദേശത്തിലെ ഭൂരിപക്ഷക്കാരായ ഈഴവസമുദായം ഇവര്ക്ക് ഭ്രഷ്ട് കല്പ്പിച്ചിരുന്നു. ഗുരുദേവനിലും അദ്ദേഹത്തിന്റെ പ്രവര്ത്തികളിലും ആകൃഷ്ടരായ കണിക്കുറുപ്പന്മാര് ശ്രീ ജി കൃഷ്ണന് വൈദ്യന്റെ നേതൃത്വത്തില് ഗുരുദേവനെ ബന്ധപ്പെടുകയും അവര് നേരിടുന്ന ഭ്രഷ്ടിനെക്കുറിച്ച് പരാതിപ്പെടുകയും അത് മാറ്റാന്വേണ്ടുന്നത് ചെയ്തു കൊടുക്കണമെന്നും ആവശ്യപ്പെട്ടു. അതിനെ തുടര്ന്നു ഗുരുദേവന് സരസകവി മൂലൂര് പത്മനാഭപണിക്കരോടൊപ്പം സ്ഥലം സന്ദര്ശിക്കുകയും മന്ത്ര-കർമ്മങ്ങൾ ഒന്നും തന്നെയില്ലാതെ ഈ കണികുറുപ്പന്മാരെ അവർ നേരിട്ടുകൊണ്ടിരുന്ന ഭ്രഷ്ടിനെതിരെ സംരക്ഷണവും അഗീകാരവും നല്കുവാന് വേണ്ടി ഈഴവരായി പ്രഖ്യാപിക്കുകയുമായിരുന്നു. തുടര്ന്നു ആ സല്ക്കര്മ്മത്തിന്റെ സാക്ഷാത്ക്കാരചിഹ്നമായി ഒരു സമൂഹസദ്യ നടത്തുകയും അതൊരു മഹദ്ദിനമായി പ്രഖ്യാപിക്കുകയും ചെയ്തു. തുടര്ന്നു ശ്രീ മൂലൂരിനോട് "ഇന്നൊരു സുദിനം തന്നെ. സമുദായചരിത്രത്തില് ഇതൊരു പ്രധാന ഘട്ടമത്രെ. ഇത് പദ്യമാക്കണം. ആ റെക്കോര്ഡ് ആലുവാ അദ്വൈതാശ്രമത്തില് സൂക്ഷിക്കണം" എന്നും ഗുരു പറയുകയുണ്ടായി. ഇതാണ് നടന്ന സംഭവം.
സമുദായത്തിലും സമൂഹത്തിലും നടന്നിരുന്ന അനീതികളെയും ദുരാചാരങ്ങളെയും അന്ധവിശ്വാസങ്ങളും കുറച്ചുകൊണ്ടുവരാനും ക്രമേണ ഇല്ലാതാക്കാനും ശ്രമിക്കുകയായിരുന്നു ഗുരുദേവന്. അതിന്റെ ഭാഗമായി കടുത്ത ഭ്രഷ്ട് നേരിട്ട് കൊണ്ടിരുന്ന ഒരു ചെറിയ സമൂഹത്തെ മന്ത്ര-തന്ത്രങ്ങളിലൂടെയല്ലാതെ വെറും ഒരു പ്രഖ്യാപനത്തിലൂടെയും സമൂഹസദ്യയിലൂടേയും മാത്രം അവരുടെ അംഗീകാരത്തിനും സംരക്ഷണത്തിനും വേണ്ടി ഒരു ഭൂരിപക്ഷസമുദായത്തിന്റെ ചിറകിൽ കൊണ്ടുവരുകയായിരുന്നു എന്നത് മനസ്സിലാക്കാൻ അല്പബുദ്ധികളായ ജന്മഭൂമി ലേഖകനും അതിന്റെ സവർണ്ണരായ മേധാവികൾക്കും മനസ്സിലാക്കാൻ പ്രയാസമുണ്ടാകും. കാരണം അവരുടെ കണ്ണുകളിൽ നിറയേ ഇന്നും അയിത്ത ചിന്തകളും അതിലൂന്നിയ അധികാരമോഹവും മാത്രമാണ്.
ഇന്നും എത്രയോ ജനവിഭാഗങ്ങൾ സമൂഹത്തിൽ ഭ്രഷ്ടനുഭവിക്കുന്നവരുണ്ട്, അവരിലേതെങ്കിലും വിഭാഗത്തെ, അതുമല്ലെങ്കിൽ ഇന്നും അവർണ്ണരായി കരുതപ്പെടുന്ന, എന്നാല് സാമൂഹ്യമായും സാമ്പത്തികമായും വിദ്യാഭ്യാസപരമായും ഏറെ മുന്നോട്ടെത്തിയ സമുദായങ്ങളിൽപ്പെട്ടവരെയെങ്കിലും സവർണ്ണജാതിയുടെ മേലങ്കിയണിയിച്ച് ഉൾക്കൊള്ളാൻ ഈ സ്വയം മേലാളന്മാരായി കരുതുന്ന ഇവർ തയ്യാറാകുമോ? അതും ഗുരുദേവൻ നടത്തിയ പോലെ വെറുമൊരു പ്രഖ്യാപനവും ഒരു സമൂഹസദ്യയും മാത്രം നടത്തിക്കൊണ്ട്. (പൂജാവിധികള് പഠിച്ചിട്ടും ശ്രീകോവിലില് കയറാനാകാത്ത അബ്രാഹ്മണരുടെ എണ്ണം എത്രയാണെന്ന് ജന്മഭൂമി ഒന്നെണ്ണി നോക്കട്ടെ?) ഗുരുവിന്റെ മാനവീയ സങ്കല്പ്പത്തില് ജാതിക്കും മതത്തിനും പ്രത്യേക പ്രാധാന്യമില്ലെന്നുള്ളതിനുള്ള തെളിവാണ് എസ്എന്ഡിപി യോഗവുമായി ബന്ധം വിടര്ത്തിക്കൊണ്ടുള്ള തന്റെ കുറിപ്പില് യോഗത്തിന്റെ പ്രവര്ത്തനത്തില് 'ജാത്യാഭിമാനം' കൂടിയതാണ് കാരണമായി പറഞ്ഞിട്ടുള്ളത്. ഏകത്വചിന്തയിലധിഷ്ടിതമായ ഗുരുവിന്റെ വിശാലമനസ്സിനെ തമസ്കരിക്കാൻ നിത്യവും ശ്രമിക്കുകയും ഗുരുദേവനെ അധികാരസക്ഷാത്കാരത്തിനായി മാത്രം ഗുരുദര്ശനത്തെ വൈകല്യ്മാക്കി അവതരിപ്പിച്ചു അവരുടെ ഒരുപകരണമാക്കാന് ശ്രമിക്കുന്ന ജന്മഭൂമി പ്രഭൃതികൾക്ക് ഇത് മനസ്സിലായാലും കണ്ണടച്ച്കാട്ടാനല്ലേ ആവൂ. കുരുട്ടുബുദ്ധിയും മനസ്സിൽ നിറയേ ഇരുട്ടുമായി നടക്കുന്ന അക്കൂട്ടർക്ക് അതിനേ കഴിയൂ.
വർഷങ്ങൾക്കുമുന്പ് സിനിമാനടി ശ്രീലതയെ നടന് കൂടിയായിരുന്ന ഡോ. നമ്പൂതിരിയെ വിവാഹം ചെയ്തതിനെ തുടർന്ന് മാസങ്ങളോളം നീണ്ടുനിന്ന മന്ത്ര-തന്ത്രാദികൾക്കു ശേഷം മാത്രമാണ് സവർണ്ണയായി തന്നെ കരുതപ്പെടുന്ന നായർ സ്ത്രീ ശ്രീലതയെ ശ്രീലതാ നമ്പൂതിരിയാക്കി മാറ്റിയതെന്ന ചരിത്രം കൂടി നമ്മൾ അറിഞ്ഞിരിക്കണം. ഡോ. നമ്പൂതിരി മരണമടഞ്ഞശേഷമാണ് പിന്നീട് അവരെ അഭിനയരംഗത്ത് കണാനായതും.
ജന്മഭൂമി വീണ്ടും തെളിവായി രേഖപ്പെടുത്തുന്നത്, പിന്നീട് ചങ്ങനാശ്ശേരിയിലേക്ക് താമസവും വൈദ്യശാലയും മാറ്റിയ ശ്രീ ജി കൃഷ്ണൻ വൈദ്യന് ഗുരുദേവൻ പരിശുദ്ധ ഈഴവനാണെന്ന സർട്ടിഫിക്കറ്റു കൊടുത്തുവെന്നാണ്. [പരിശുദ്ധനെന്നു ഗുരു ഉദ്ദേശിച്ചത് കള്ള് ചെത്താത്ത, ഉപയോഗിക്കാത്ത, കച്ചവടം ചെയ്യാത്തവന് എന്നാണു]. ഈഴവർക്കായി സംവരണ ചെയ്തിരുന്ന ചങ്ങനാശ്ശേരി മുനിസിപ്പല് കൌണ്സില് അംഗത്വം ജന്മം കൊണ്ട് കണിക്കുറുപ്പ് എന്ന താഴ്ന്ന ജാതിക്കാരനും ഗുരുവിന്റെ വെറും ഒരു പ്രഖ്യാപനം കൊണ്ട് മാത്രം ഈഴവനായി "കയറ്റം" കിട്ടിയ വൈദ്യര്ക്ക് കിട്ടാനായി അത്തരം സര്ട്ടിഫിക്കറ്റ് കൊടുക്കുക വഴി തന്റെ പ്രവര്ത്തിക്കു അദ്ദേഹം ഔദ്യോഗികമായി സ്ഥിരീകരണം നൽകുകയായിരുന്നുവെന്ന് വേണം കരുതാന്. ഗുരുദേവനിൽ നിന്നും തന്നെ ഇത്തരം ഒരു സർട്ടിഫിക്കറ്റു ഹാജരാക്കാൻ ആവശ്യപ്പെട്ടത് ഗുരുദേവന്റെ സോഷ്യൽ എഞ്ചിനീയറിംഗ് കാഴ്ചപ്പാട് തീർത്തും അറിയുമായിരുന്ന,
"ഒരു മതം മതിയിനി പരസ്നേഹം
ഒരു വര്ഗ്ഗം മതി മനുഷ്യ സംജ്ഞകം ഒരു രാഷ്ട്രം മതി ധരാതലം; നമു- ക്കൊരു ദൈവം മതി ഹൃദിസ്ഥിതം"
എന്നീ വരികളിലൂടെ ഗുരുവിന്റെ എകലോകദര്ശനത്തെ പൂര്ണ്ണമായും ഉള്ക്കൊണ്ട മഹാകവി ഉള്ളൂർ എസ് പരമേശ്വരയ്യരുടെ ആവശ്യപ്രകാരമാണെന്നു കൂടിയറിയണം. വൈദ്യരുടെ നിയമനത്തിനെതിരെ ചന്ദ്രഹാസമിളക്കി നിന്ന ചങ്ങനാശ്ശേരിയിലെ ഈഴവപ്രമാണിമാരെ ജാതി ഇത്രയേയുള്ളൂവെന്ന് ഗുരുദേവനേക്കൊണ്ടുതന്നെ പറയിപ്പിക്കുകയായിരുന്നില്ലേ മഹാകവി ഗുരുദേവ ചരിതത്തിലെ ഈ ചെറിയോരേടിലൂടെ?
By: മോഹനകുമാര് പത്മനാഭന്
|
|
Posted: 17 Jul 2016 06:28 AM PDT
ഒരു ഗുരുഭക്തന്റെ ഭക്തിയുടെ പാരമ്യം ഗുരുവിനെ ദൈവമായി കണ്ടു ആരധിക്കുന്നതാണ് എന്ന് പലരും ധരിച്ചു വച്ചിരിക്കുന്നത്. എന്നാല് ഗുരുഭക്തിയുടെ മൂര്ത്തിമത് ഭാവം എന്നത് ഗുരുവിനെ പരമഗുരുവായി തന്നെ കാണാന് സാധിക്കുക എന്നതാണ് . പക്ഷെ സാധാരണക്കാരായ നമ്മെ പോലെയുള്ളവര്ക്ക് അത് സാദ്ധ്യമായെന്നു വരില്ല അങ്ങനെയുള്ള നമുക്ക് ആ മാര്ഗ്ഗത്തിലേക്ക് എത്തുന്നതിലെക്കായി ഗുരുവിനെ ദൈവമായി കണ്ടു ആരാധിക്കാം . പക്ഷെ അവിടെ ഉറച്ചു നില്ക്കാതെ ഗുരുവിന്റെ കൃതികള് പഠിച്ചും മനനം ചെയ്തും നമുക്ക് അടുത്ത അവസ്ഥയിലേക്ക് എത്തിച്ചേരാന് ഉള്ള അവസരം സൃഷ്ടിക്കുകയാണ് ചെയ്യേണ്ടത്.
നടരാജ ഗുരുവിനെയും ,നിത്യ ചൈതന്യ യതിയും മുനി നാരായണ പ്രസാദിനെയും പോലെയുള്ള ഗുരു ശിഷ്യന്മാരുടെ സ്ഥാനം ആ തലത്തിലാണ് അതുകൊണ്ടാണ് അവരുടെ പഠനങ്ങളിലും എഴുത്തിലും എല്ലാം ഗുരുവിന്റെ ഈശ്വരീയതയിലുപരിയായി നാരയണ ഗുരു , നാരായണ ഗുരുവായി നില്ക്കുന്നത് .
അതെ സമയം തന്നെ ഗുരുവിനെ ദൈവമായി കണ്ടു ക്ഷേത്ര പ്രതിഷ്ടകളിലൂടെ ഗുരുവിനെ തങ്ങളുടെ ആശ കേന്ദ്രമായി കണ്ടു പ്രാര്ത്ഥിച്ചു മന സംതൃപ്തി അടയുന്ന ലക്ഷക്കണക്കിന് വരുന്ന ഗുരു ഭക്തരെ നിസാര വല്ക്കരിക്കേണ്ട കാര്യവും ഇല്ല കാരണം , വാളും പരിചയും ഏന്തി ഹിംസ്ര മൃഗങ്ങളുടെ പുറത്ത് നില്ക്കുന്ന ദേവീ ദേവന്മാരുടെ വിഗ്രഹങ്ങളെക്കാള് അവര്ക്ക് സമാധാനവും സന്തോഷവും ലഭിക്കുന്നത് പരമകാരുണികനായ ഭഗവാന് ശ്രീ നാരായണ ഗുരുദേവന്റെ സ്വാത്വിക ഭാവത്തോടെയുള്ള മുഖം തന്നെയാണ് . മനംനൊന്ത് പ്രാര്ത്ഥിച്ചാല് അവനെ കരകയറ്റാന് ഗുരു തുണക്കുണ്ടാകും എന്ന വിശ്വാസം ആണ് , സര്വ്വോപരി മാതാപിതാകന്മാര് പറഞ്ഞു കൊടുത്തിരിക്കുന്ന "നമ്മുടെ ദൈവം" ആണ് ശ്രീ നാരായണ ഗുരുദേവന് .
അതിനാല് തന്നെ ചിന്തയിലും പ്രവര്ത്തിയിലും വിവധ തലങ്ങളില് ഉള്ളവര് അവരവരുടേതായ രീതിയില് ഗുരുവിനെ ദര്ശിക്കട്ടെ , താഴെ നിന്നും മുകളിലേക്ക് കയറുവാന് ശ്രമിക്കട്ടെ രണ്ടിനെയും വിമര്ശിക്കാതെ , ഗുരുമാര്ഗ്ഗത്തിലേക്കുള്ള വിവിധ വഴികളായി കണ്ടു കൊണ്ട് മുന്നോട്ടു പോകാം .
എഴുതിയതില് തെറ്റുണ്ടെങ്കില് അറിവുള്ളവര് ദയവായി പങ്ക് വയ്ക്കുക , " വാദിക്കാനും ജയിക്കാനുമല്ല , അറിയാനും അറിയിക്കാനും."
സ്നേഹപൂര്വ്വം
സുധീഷ് സുഗതന് .
|
|
Posted: 17 Jul 2016 06:25 AM PDT
പരബ്രഹ്മ സ്വരൂപനായ ശ്രീനാരായണ ഗുരുവിന്റെ ദർശനവും സന്ദേശങ്ങളുമൊക്കെ ഇന്ന് കേരളത്തിൽ വളരെയധികം ചർച്ച ചെയ്യപ്പെടുന്നു എന്നുള്ളത് ഏറെ സന്തോഷകരമായ അനുഭവമാണ്. ഗുരുവിന്റെ ദാർശനിക ചിന്താധാരകളും തത്വദർശനവുമെല്ലാം തന്നെ വരികളിലൂടെയും വരികൾക്കിടയിലൂടെയും വ്യാഖ്യാനിച്ചും വിവർത്തനം ചെയ്തും മലയാളിയുടെ മനസ്സിലേയ്ക്ക് തിരമാലകൾ പോലെ സന്നിവേശിപ്പിക്കാനുള്ള ശ്രമത്തെ എസ്സ്.എൻ.ഡി.പി യോഗം ഉപാധിരഹിതമായി പ്രോത്സാഹിപ്പിക്കുകയും സഹായിക്കുകയും ചെയ്യും. കുടുംബയൂണിറ്റുകളിലൂടെയും, സ്വയംസഹായസംഘങ്ങളിലൂടെയും, വിദ്യാഭ്യാസസ്ഥാപനങ്ങളിലൂടെയും എല്ലാം തന്നെ കഴിഞ്ഞ രണ്ടു ദശകങ്ങളായി യോഗം ഇത് പ്രചരിപ്പിക്കുന്നതിന് ഏറെ പ്രാധാന്യം നൽകിക്കൊണ്ടിരിക്കുന്നു. രാഷ്ട്രീയ പാർട്ടികളും പൊതുസമൂഹവും ഗുരുദർശനം പ്രചരിപ്പിക്കുന്നതിനുള്ള സന്നദ്ധത പ്രകടിപ്പിക്കുമ്പോൾ യോഗം അതിന്റെ ചരിത്രപഥത്തിലൂടെ ശരിയായ ദിശയിലേയ്ക്ക് സഞ്ചരിക്കുന്നു എന്നർത്ഥം. എന്നാൽ ചിലപ്പോഴെങ്കിലും ഗുരുസന്ദേശത്തിലെ ഒന്നോ, രണ്ടോ വരികൾ മാത്രം അടർത്തിയെടുത്ത് അത് പറഞ്ഞ സാഹചര്യത്തെയും കാലഘട്ടത്തെയും മന:പൂർവ്വം തമസ്ക്കരിച്ച് ഗുരുവിന്റെ ദർശനങ്ങളെ വളച്ചൊടിക്കുവാനുള്ള ശ്രമം നടന്നിട്ടുണ്ട്. അത്തരം ഏടുകൾ മാത്രമെടുത്ത് വലിയ കാമ്പയിൻ പ്രവർത്തനം നടത്തുമ്പോൾ അതിന്റെ അകം പൊരുൾ വിശകലനവും നാം നടത്തേണ്ടതായിട്ടുണ്ട്. അല്ലെങ്കിൽ അത് ഗുരുദർശനങ്ങളെ അവഹേളിക്കുന്നതാകും. ഇപ്പോൾ ഈ കുറിപ്പ് ഇവിടെ എഴുതുവാനുള്ള സന്ദർഭം അത്തരമൊരു സാഹചര്യം ഉടലെടുക്കുന്നു എന്നുള്ളതു കൊണ്ടാണ്. '' നമുക്ക് ജാതിയില്ലാ'' എന്ന ഒരു വരിയെടുത്ത് അത് മഹാ വിളംബര സന്ദേശമായി വ്യാഖ്യാനിച്ച് രാഷ്ട്രീയ ലക്ഷ്യങ്ങൾക്ക് ഉപയോഗിക്കുവാൻ ചിലർ ശ്രമിക്കുമ്പോൾ അതിന്റെ പ്രചാരകരായി ഗുരുധർമ്മം പ്രചരിപ്പിക്കുവാൻ ഗുരുകല്പിച്ച് ചുമതലപ്പെടുത്തിയിട്ടുള്ളവർ മാറുന്നത് ആശാസ്യമല്ല. ഗുരു ആജീവനാന്ത പ്രസിഡന്റായി രൂപീകരിച്ച എസ്. എൻ ഡി. പി. യോഗത്തിന്റെ നിയമാവലിയിൽ ഈഴവസമുദായത്തിൽ വൈദീകവും ലൗകീകവുമായ വിദ്യാഭ്യാസത്തേയും വ്യവസായ ശീലത്തേയും അഭിവൃദ്ധിപ്പെടുത്തുന്നതിനും അവയുടെ പ്രചാരണത്തിനായി ....... എന്നിങ്ങനെ രേഖപ്പെടുത്തിയതും സമൂഹത്തിലെ ഉച്ച നീചത്വങ്ങളെ ഇല്ലാതാക്കി സമഭാവനയുടെ നാളുകൾക്ക് വേണ്ടിയായിരുന്നു. അരുവിപ്പുറത്ത് ഈഴവ ശിവനെ പ്രതിഷ്ഠിച്ചത് ഗുരു തന്നെയായിരുന്നു. ശിവഗിരി തിർത്ഥാടനത്തിന് അനുവാദം ചോദിച്ചതും ഗുരു അതിന് അനുമതി നൽകിയതും ഈഴവർക്കായിരുന്നു. 1916 ൽ ''നമുക്ക് ജാതിയില്ല ''എന്ന് ഗുരു വിളംബരം ചെയ്യുന്നതിനു മുമ്പ് സമുദായത്തിലെ ആചാരാനുഷ്ഠാനങ്ങൾ പരിഷ്ക്കരിക്കുന്നതിനുള്ള സംഗതികൾ എസ്. എൻ. ഡി. പി. യോഗത്തിന്റെ പൊതുയോഗത്തിൽ കൊണ്ടുവരണമെന്ന് യോഗം ജനറൽ സെക്രട്ടറിക്ക് കത്ത് എഴുതിയതും ചെറായി , വിജ്ഞാനവർദ്ധിനി സഭയിൽ ഗുരു നടത്തിയ പ്രസംഗത്തിൽ നമ്മുടെ സമുദായത്തിലെ ഉയർന്ന വിദ്യാഭ്യാസത്തിന്റെ ആവശ്യകതയേയും പ്രാധാന്യത്തെയും കുറിച്ച് സംസാരിച്ചതും ചരിത്രമാണ്. ജാതി വിവേചനം ഇല്ലാതാക്കുവാൻ ജാതിസംവരണം ഭരണഘടനയിൽ ചേർത്തതിന്റെ ഫലമായി കേന്ദ്ര-സംസ്ഥാന നിയമനിർമ്മാണ സഭകളിൽ പട്ടിക ജാതി -വർഗ്ഗ സംവരണം ഇന്നും നിലനിൽക്കുന്നു. സിവിൽ സർവ്വീസ് പരീക്ഷമുതൽ ശിപായി വരെയുള്ള ഉദ്യോഗത്തിനും ഈ പരിരക്ഷ ലഭിക്കുന്നു. എന്തിനേറെ എൽ. പി. സ്ക്കൂളിലുള്ള ഉച്ചക്കഞ്ഞി വിതരണത്തിൽ വരെ ജാതി നിലനിൽക്കുന്നു. നമ്മുടെ രാജ്യത്ത് സർക്കാർ ആനുകൂല്യങ്ങൾ ജാതി മതാടിസ്ഥാനത്തിൽ വീതം വയ്ക്കുമ്പോൾ ജനസംഖ്യാനുപാതികമായി സമുദായത്തിനു ലഭിക്കേണ്ടത് വേണമെന്ന് പറയുന്നത് ജാതിയമല്ല. ഗുരുദർശനത്തിന് വിരുദ്ധവുമല്ല. സാമൂഹ്യനീതിയുടെ നീതി ശാസ്ത്രമാണ്. സാമൂഹ്യപരമായ ഉച്ചനീചത്വം ഒരു പരിധി വരെ അവസാനിപ്പിക്കുവാൻ കഴിഞ്ഞെങ്കിലും പൊതുഖജനാവിലെ സമ്പത്ത് വിതരണം ചെയ്യുമ്പോഴും അധികാരസ്ഥാനങ്ങൾ പങ്കുവെയ്ക്കുമ്പോഴും ഈഴവ സമുദായത്തെ ഗുരുദർശനത്തിന്റെ അടർത്തിയെടുത്ത ഏടു പഠിപ്പിച്ച് കാതങ്ങൾ മാറ്റി നിർത്തുമ്പോൾ എസ്സ് .എൻ.ഡി.പി യോഗത്തിന് പ്രതികരിക്കാതിരിക്കാൻ കഴിയില്ല. കാരണം ഇതൊരു സമര സംഘടനകൂടിയാണ്. സ്വാതന്ത്ര്യാനന്തരം രാജ്യത്തിന്റെ കാര്യങ്ങൾ സാമൂഹ്യ നീതിയിലൂടെ രാഷ്ട്രീയപാർട്ടികൾ നടപ്പാക്കുമെന്നുള്ള പ്രതീക്ഷയോടെ യോഗം രാഷ്ട്രീയകാര്യങ്ങളിൽ നിന്നും പിൻമാറി സമുദായകാര്യങ്ങളിൽ നിലയുറപ്പിച്ചു. എന്നാൽ നിവർത്തന പ്രക്ഷോഭത്തിൽ പങ്കെടുത്ത മുസ്ളിം, കൃസ്ത്യൻ വിഭാഗങ്ങൾ രാഷ്ട്രീയത്തിൽ തുടർന്ന് അധികാരവും സമ്പത്തും ഏറെ നേടിക്കൊണ്ടിരുന്നു. സ്ഥിതി വിവരകണക്കുകൾ പരിശോധിച്ചാൽ ആർക്കും മനസ്സിലാവുന്ന സംഗതിയാണിത്. സമുദാത്തിന്റെ പേരിൽ തന്നെ രാഷ്ട്രീയപാർട്ടി ഉണ്ടാക്കി പ്രവർത്തിക്കുകയും മത്സരിക്കുകയും ഭരിക്കുകയും അഴിമതി വ്യവസായമാക്കി നടത്തുന്ന വരെയും കാണുവാൻ മതേതര ചിന്തകന്മാർക്ക് കഴിയുന്നില്ല. ജാതി ചിന്ത വളർത്തി മനുഷ്യരെ ഭിന്നിപ്പിച്ചു നിർത്തി അധികാരത്തിൽ കടിച്ചു തൂങ്ങുവാൻ വേണ്ടി അടവു നയവും തെരഞ്ഞെടുപ്പ് തന്ത്രങ്ങളുമൊക്കെ രൂപപ്പെടുത്തുന്ന രാഷ്ട്രീയ പാർട്ടികളാണ് യഥാർത്ഥ വർക്ഷീയത സൃഷ്ടിക്കുന്നതെന്ന് മനസ്സിലാക്കുവാൻ ഒരു ബുദ്ധിമുട്ടുമില്ല. അതിന്റെ അവസാനത്തെ ഉദാഹരണമാണ് മാൻഹോളിൽ വീണ് മരിച്ച നൗഷാദിന്റെ കുടുംബത്തിന് കൊടുത്തതു പോലെ സമാനസംഭവങ്ങളിലും നിലപാട് സ്വീകരിക്കണമെന്ന് പറഞ്ഞപ്പോൾ മറ്റു സമുദായത്തിലെ വോട്ടുകൾ ലക്ഷ്യം വച്ച് യോഗം ജനറൽ സെക്രട്ടറിയ്ക്കെതെിരെ കേസ്സു കൊടുത്തത്. അതേ പോലെ തന്നെ ബിസി.ഡി.സി വായ്പ എടുത്ത മറ്റു സമുദായനേതാക്കളുടെ പേരിൽ പരാതി നൽകാതെ യോഗം ജനറൽ സെക്രട്ടറിയുടെ പേരിൽ മാത്രം കള്ള പരാതി കൊടുത്തതും മറ്റു സമുദായത്തിന്റെ കൈയ്യടി നേടി ജയിക്കുവാനായിരുന്നു. യഥാർത്ഥത്തിൽ ജാതി ചിന്ത ഇല്ലാതാവണമെങ്കിൽ ജാതി വിവേചനം ഇല്ലാതാവണം. അതിന് തുല്യ നീതിയും വിഭവവിതരണത്തിൽ സാമൂഹ്യ നീതിയും ഉണ്ടാവണം. പരബ്രഹ്മസ്വരൂപനായി മാറിയ ഗുരുദേവൻ, വിശ്വമാകെ ഒന്നായി കണ്ട ഗുരുദേവൻ, പ്രഥമ ശിഷ്യനായ ശിവലിംഗദാസ സ്വാമികൾ ശിവസ്വരൂപത്തിൽ കണ്ട ഗുരുദേവൻ, എല്ലാ സീമകൾക്കും മുകളിലാണ്. അവിടെ ജാതിയില്ല, മതമില്ല, വർണ്ണമില്ല, വർഗ്ഗമില്ല. ഉള്ളത് വിശ്വമാനവികത മാത്രമാണ്. ചക്രവാളം മുതൽ ചക്രവാളം വരെ ഒന്നാണെന്ന സത്യത്തിൽ നിന്നു കൊണ്ട് പരമ ഗുരു ചെയ്ത 'നമുക്ക് ജാതിയില്ല' എന്ന വിളംബരം അതിന്റെ അന്ത:സത്ത മനസ്സിലാക്കാതെ എടുത്ത് പ്രയോഗിച്ചാൽ അതിൽപരം വല്ല ഗുരുനിന്ദയുമുണ്ടോ. അന്ധൻ ആനയെ കണ്ടതു പോലെ ഗുരുദർശനങ്ങളെ കാണുന്നവർക്ക് മാത്രമേ ഇത്തരത്തിൽ ചിന്തിക്കുവാൻ ആകൂ മാനവിക നന്മയാണ് ലക്ഷ്യമെങ്കിൽ, അരുവിപ്പുറത്തു കുറിച്ച ജാതിഭേദം മതദേഷ്വം ഏതുമില്ലാതെ സർവരും സോദരത്വേന വാഴുന്ന മാതൃകാ സ്ഥാനമാണ് ലക്ഷ്യമെങ്കിൽ കേരളത്തിലെ 75000 സ്വയം സഹായസംഘങ്ങളിലൂടെയും 30000 കുടുംബയോഗങ്ങളിലൂടെയും 6857 ശാഖകളിലൂടെയും എല്ലാ യൂണിയനുകളിലൂടെയും ഗുരുവരുൾ പ്രചരിപ്പിക്കുവാൻ യോഗം എന്നും കൈ മെയ്യ് മറന്ന് കൂടെ ഉണ്ടാകും. അതല്ലാതെ സങ്കുചിത രാഷ്ട്രീയമാണ് ലക്ഷ്യമെങ്കിൽ അത് ഗുരുവിന്റെ ലക്ഷ്യത്തിൽ നിന്നുള്ള വ്യതിചലനവും ഗുരുനിന്ദയും ആയിരിക്കും. |
|
Posted: 17 Jul 2016 06:15 AM PDT
ചെങ്ങന്നൂര് ക്ഷേത്രത്തിന് അടുത്ത് ഒരിക്കല് ശ്രീ നാരായണ ഗുരുദേവന് വിശ്രമിയ്ക്കുന്നു... ഗുരുദേവന് അവിടെ വന്നതറിഞ്ഞ് ഗുരുവിനെ കാണുവാനും സംസാരിക്കുവാനുമായി പലരും അടുത്ത് കൂടി. അതേ സമയം പല്ലുകളെല്ലാം കൊഴിഞ്ഞ ഭീമാകായനായ ഒരു കോമരം ക്ഷേത്രത്തില്നിന്നും ഉറഞ്ഞ് തുള്ളി അവിടെയെത്തി. കോമരത്തെ കണ്ടപ്പോള് പലരും ഗുരുവിന്റെ അടുത്ത് നിന്നും അങ്ങോട്ടുപോയി; ഗുരുദേവന് അത് ശ്രദ്ധിക്കാതെ ആല്ത്തറയില് തന്നെ വിശ്രമിക്കുകയും ചെയ്തു...!. തന്നെ വകവയ്ക്കാതെ ഒരാള് മാത്രം ആല്ത്തറയില് ഇരിക്കുന്നത് കണ്ട്, കോമരം തുള്ളിക്കൊണ്ട് ഗുരുവിന്റെ അരികിലെത്തി; അതുകണ്ട് അനേകം ആളുകള് അവിടെ അടുത്തുകൂടി. കോമരം സ്വാമിയോട് ചോദിച്ചു... "ഞാന് ആരാണെന്ന് അറിയാമോ...?" ഗുരു: "കണ്ടിട്ട് ഒരു തടിമാടനാണെന്ന് തോന്നുന്നു" കോമരം: "എന്ത്...? നമ്മെ പരിഹസിക്കുന്നോ...? പരീക്ഷ വല്ലതും കാണാണോ?" ഗുരു: (ചിരിച്ച്കൊണ്ട് ) "പല്ലില്ലാത്ത ആ വായില് പല്ലൊന്ന് കണ്ടാല് കൊള്ളാം" കോമരവും അടുത്തുനിന്നവരും ചിരിച്ചുപോയി...! സമൂഹത്തില് ആഴത്തില് വേരോടിയ പല അന്ധ:വിശാസങ്ങളെയും ഗുരുദേവന് ഒരു നിമിഷം കൊണ്ട് തകര്ത്ത് തരിപ്പണമാക്കിയത് ഇങ്ങനെ ചില ഫലിതങ്ങളിലൂടെയാണ്...! അങ്ങിനെ ഫലിതങ്ങളും യുക്തികളും അറിവും പകര്ന്നു തന്ന് ആ അവതാര യുഗപുരുഷന് കടന്നുപോയി...! പക്ഷെ ദേഹം മുഴുവന് അന്ധവിശ്വാസങ്ങളും അനാചാരങ്ങളും വച്ചുകെട്ടി മതങ്ങളും മനുഷ്യരും ഇന്നും ലോകം മുഴുവന് ഉറഞ്ഞു തുള്ളുന്നു..! അതിനൊപ്പം തുള്ളാന് കുറെ അന്ധ:വിശ്വാസികളും...! - ഗുരുദേവസ്മരണയില് |
|
Posted: 17 Jul 2016 06:12 AM PDT
ഇന്നേക്ക് നൂറ് സംവത്സരംമുമ്പുള്ള ഇതേദിവസം, അതായത് 1916 ജൂലൈ 16ന് പുറത്തിറങ്ങിയ സ്വദേശാഭിമാനി പത്രത്തില് ശ്രീനാരായണഗുരുദേവന്റെ ഒരു പ്രസംഗം വളരെ പ്രാധാന്യത്തോടെ പ്രസിദ്ധീകരിച്ചു. അന്നും ഇന്നും എന്നും സമൂഹത്തില് ഏറെ പ്രസക്തമായി നില്ക്കുന്ന ആ ചരിത്രപ്രസിദ്ധമായ പ്രസംഗഭാഗം ഇന്നത്തെ തലമുറയ്ക്കുവേണ്ടി ഒരിക്കല്ക്കൂടി ഉദ്ധരിക്കാം.
"മനുഷ്യരില് ഗുണകര്മപാകം അനുസരിച്ച് ചാതുര്വര്ണ്യം കല്പ്പിക്കാം. എന്നാല്, ഇപ്പോള് കാണുന്ന മനുഷ്യനിര്മിതമായ ജാതിവിഭാഗത്തിന് യാതൊരു അര്ത്ഥവുമില്ല. അനര്ത്ഥകരവുമാണ്. അതു നശിക്കതന്നെ വേണം. മേല്ജാതിയെന്നും കീഴ്ജാതിയെന്നും ഉള്ള വിചാരംതന്നെ ഇല്ലാതാക്കണം. ഈ വിചാരം നമ്മില്നിന്ന് പോയിട്ട് വളരെയേറെക്കാലമായി. സാമുദായിക സംഗതികള്ക്കും മതത്തിനും തമ്മില് സംബന്ധമൊന്നും പാടില്ല. മതം മനസ്സിന്റെ കാര്യമാണ്. ആരുടെയും മതസ്വാതന്ത്യ്രത്തെ തടയരുത്. പല മതക്കാരായ മനുഷ്യരുണ്ടല്ലോ. അവരില് ഓരോരുത്തരുടെയും മനസ്സിന്റെ ഗതിക്കും വളര്ച്ചയ്ക്കുമനുസരിച്ചു ഭിന്നമതങ്ങള് കൂടിയേ തീരൂ. എല്ലാവര്ക്കും സ്വീകാര്യമാകുന്ന ഒറ്റമതം ഉണ്ടാവാന് പ്രയാസമാണ്''.
"എന്റെ മതം സത്യം, മറ്റുള്ളവരുടെ മതം അസത്യം എന്ന് ആരും പറയരുത്. സകല മതങ്ങളിലും സത്യമുണ്ട്. അതെല്ലാം സ്ഥാപിച്ചിട്ടുള്ളതും സദുദ്ദേശ്യത്തോടുകൂടിയാണ്. ഇപ്പോള് നടപ്പിലിരിക്കുന്ന ഏതെങ്കിലും ഒരു പ്രത്യേക മതവുമായിട്ട് നമുക്ക് യാതൊരു പ്രത്യേക സംബന്ധവുമില്ല. നാമായിട്ട് ഒരു പ്രത്യേക മതം സ്ഥാപിച്ചിട്ടുമില്ല. എല്ലാ മതങ്ങളും നമുക്ക് സമ്മതമാണ്. ഓരോരുത്തരും അവരവര്ക്കിഷ്ടമുള്ള മതം ആചരിച്ചാല് മതി. നാം ചില ക്ഷേത്രങ്ങള് പ്രതിഷ്ഠിച്ചിട്ടുള്ളത് ഹിന്ദുക്കളില് ചിലരുടെ ആഗ്രഹം അനുസരിച്ചാണ്. ഇതുപോലെ ക്രിസ്ത്യാനികള്, മുഹമ്മദീയര് മുതലായ മറ്റു മതക്കാരും ആഗ്രഹിക്കുന്നപക്ഷം അവര്ക്കായും വേണ്ടത് ചെയ്യുവാന് നമുക്കെപ്പോഴും സന്തോഷമാണുള്ളത്. നാം ജാതിമതഭേദങ്ങള് വിട്ടിരിക്കുന്നു എന്നു പറയുന്നതിന് യാതൊരു ജാതിയോടും മതത്തോടും നമുക്ക് പ്രത്യേക മമതയില്ലെന്നു മാത്രമേ അര്ത്ഥമുള്ളൂ''.
അച്യുതന് മേസ്തിരി എന്ന ഒരു ഗുരുദേവഭക്തന് കൊല്ലം പട്ടത്താനത്ത് പണികഴിപ്പിച്ച ബംഗ്ളാവിന്റെ ഉദ്ഘാടനത്തിനെത്തിയ അവസരത്തില് ഗുരു നടത്തിയ പ്രസംഗമാണിത്. മഹാകവി കുമാരനാശാന്, സി വി കുഞ്ഞുരാമന്, ടി കെ മാധവന് തുടങ്ങി വലിയൊരു പുരുഷാരം അപ്പോഴവിടെ സന്നിഹിതരായിരുന്നു.
ജാതിവിവേചനത്തിന്റെയും മതവൈരത്തിന്റെയും ദുഷിച്ച വാദപ്രതിവാദങ്ങളും ആചാരാനുഷ്ഠാനപരമായ വൈവിധ്യങ്ങളും സമൂഹത്തില് ഉറച്ചുപോയ ആ കാലഘട്ടത്തില് ഏറ്റവും കൂടുതല് ചര്ച്ചചെയ്യപ്പെട്ടത് ഗുരുവിന്റെ 'ഒരു ജാതി ഒരു മതം ഒരു ദൈവം മനുഷ്യന്' എന്ന മഹാസന്ദേശമായിരുന്നു. ഈ സന്ദേശത്തെ ജാതി–സമുദായ നേതാക്കളും പണ്ഡിതമാനികളും അവരവരുടെ പാണ്ഡിത്യം പ്രകടിപ്പിക്കുംവിധം പലവിധത്തില് വ്യാഖ്യാനിക്കുകകൂടി ചെയ്തപ്പോള് അതെല്ലാം ഈ സന്ദേശത്തിന്റെ ഉള്ളടക്കത്തില് ഗുരുദേവന് കൊളുത്തിവച്ച പൊരുളിന്റെ പ്രകാശനത്തിനു മങ്ങലേല്പ്പിക്കുകവരെ ചെയ്തു. 1914ല് പുറത്തുവന്ന 'ജാതിനിര്ണയം' എന്ന ഗുരുദേവകൃതിയില്നിന്നാണ് 'ഒരു ജാതി ഒരു മതം ഒരു ദൈവം മനുഷ്യന്' എന്ന അമരസന്ദേശം സമൂഹമധ്യത്തിലെത്തിയത്. പക്ഷേ, ഇതുകൊണ്ടൊന്നും ജാത്യാന്ധന്മാരുടെ കണ്ണുകള് തുറക്കപ്പെട്ടില്ല, എന്നുമാത്രമല്ല
മനുഷ്യാണാം മനുഷ്യത്വം
ജാതിര്ഗോത്വം ഗവാം യഥാ ന ബ്രാഹ്മണാദിരസ്യൈവം ഹാ! തത്ത്വം വേത്തി കോƒപി ന–
എന്ന ഗുരുവിന്റെ ജാതിമീമാംസ, ഗുരുവിന്റെ അനുയായികളില്പ്പെട്ടവര്പോലും വേണ്ടത്ര ഉള്ക്കൊള്ളാതെയും പോയി.
പശുക്കളുടെ ജാതി ഗോത്വം എന്നായിരിക്കുന്നതുപോലെ മനുഷ്യരുടെ ജാതി മനുഷ്യത്വമാണെന്നു ജീവശാസ്ത്രത്തിനും തത്ത്വശാസ്ത്രത്തിനും പൊതുസമ്മതമാകുംവിധം പഠിപ്പിച്ച ഗുരുദേവന്, തന്റെ ഈ തത്ത്വം വേണ്ടുംവിധം മനുഷ്യസമൂഹം ഉള്ക്കൊള്ളാത്തതില് സ്വയം പരിതപിക്കുകകൂടി ചെയ്യുന്നതായി ഇവിടെ കാണാം. എന്നിട്ടും ജാതിവാദികള് തങ്ങളുടെ ജാതിവരമ്പുകള്ക്കുള്ളില്പ്പെടുത്തി ഗുരുവിനുപോലും ജാതി കല്പ്പിക്കുകയും അതനുസരിച്ച് വിചാരിക്കുകയും പ്രവര്ത്തിക്കുകയും ചെയ്തുവന്നു. ഈ അവാസ്തവികതയും തത്സംബന്ധമായ പ്രചാരണവും ശ്രദ്ധയില്പ്പെട്ട ഗുരുദേവന് ജാതിയുടെ നിരര്ഥകതയെ ജനങ്ങള്ക്ക് ബോധ്യമാക്കിക്കൊടുക്കുന്നതിനും ജാതിസമൂഹത്തെ മനുഷ്യസമൂഹമാക്കി പരിവര്ത്തനപ്പെടുത്തുന്നതിനും ഉദ്ദേശിച്ചാണ് 1091 ഇടവം 15ന് 'നാം പ്രത്യേക ജാതിയിലോ മതത്തിലോ ഉള്പ്പെടുന്നില്ല' എന്ന മഹാവിളംബരം ആലുവ അദ്വൈതാശ്രമത്തില് വച്ച് പുറപ്പെടുവിച്ചത്. (ഇപ്പോള് ഈ വിളംബരത്തിന്റെ ശതാബ്ദിയാഘോഷങ്ങള് ശിവഗിരിമഠത്തിന്റെയും ഗുരുധര്മപ്രചാരണസഭയുടെയും ആഭിമുഖ്യത്തില് നടന്നുവരികയാണെന്നുകൂടി പറഞ്ഞുകൊള്ളട്ടെ) ഈ വിളംബരത്തിന്റെ പൂര്ണരൂപം ചുവടെ ചേര്ക്കുന്നു.
"നാം ജാതിമതഭേദം വിട്ടിട്ട് ഇപ്പോള് ഏതാനും സംവത്സരങ്ങള് കഴിഞ്ഞിരിക്കുന്നു. എന്നിട്ടും ചില പ്രത്യേക വര്ഗക്കാര് നമ്മെ അവരുടെ വര്ഗത്തില്പ്പെട്ടതായി വിചാരിച്ചും പ്രവര്ത്തിച്ചും വരുന്നതായും അത് ഹേതുവാല് പലര്ക്കും നമ്മുടെ വാസ്തവത്തിനു വിരുദ്ധമായ ധാരണയ്ക്കിട വന്നിട്ടുണ്ടെന്നും അറിയുന്നു''.
"നാം പ്രത്യേക ജാതിയിലോ മതത്തിലോ ഉള്പ്പെടുന്നില്ല. വിശേഷിച്ചും നമ്മുടെ ശിഷ്യവര്ഗത്തില്നിന്നും മേല്പ്രകാരമുള്ളവരെ മാത്രമേ നമ്മുടെ പിന്ഗാമിയായി വരത്തക്കവിധം ആലുവ അദ്വൈതാശ്രമത്തില് ശിഷ്യസംഘത്തില് ചേര്ത്തിട്ടുള്ളൂ എന്നും മേലും ചേര്ക്കുകയുള്ളൂ എന്നും വ്യവസ്ഥപ്പെടുത്തിയിരിക്കുന്നതുമാകുന്നു. ഈ വസ്തുത പൊതുജനങ്ങളുടെ അറിവിലേക്കായി പ്രസിദ്ധം ചെയ്തിരിക്കുന്നു.''
എന്ന്
നാരായണഗുരു (ഒപ്പ്) (പ്രബുദ്ധകേരളം മാസിക, കൊല്ലവര്ഷം 1091 മിഥുനം ലക്കം)
ഈ വിളംബരം സമൂഹത്തില് വലിയ ചര്ച്ചയ്ക്കിടയാക്കുകയും ചരിത്രപരമായ മാറ്റങ്ങള്ക്ക് ഗതിവേഗമുണ്ടാക്കുകയും ചെയ്തു. ഇതിന്റെ തുടര്ച്ചയാണ് ജാതിയും മതവും മനുഷ്യരിലും സമൂഹത്തിലും കയറി മൂത്തുനിന്ന പശ്ചാത്തലത്തില് ഗുരുദേവന് കൊല്ലത്ത് നടത്തിയ പ്രസംഗവും. 'നാം പ്രത്യേക ജാതിയിലോ മതത്തിലോ ഉള്പ്പെടുന്നില്ല' എന്ന വിളംബരം പുറപ്പെടുവിച്ചതിന് തൊട്ടുപിന്നാലെയാണ് ഗുരു ഈ പ്രസംഗവും നടത്തിയതെന്നത് ഏറെ ശ്രദ്ധേയം. ടി കെ മാധവനാണ് അതിന് നിമിത്തമായത്. സ്വാമിയുടെ 'മതദര്ശനം' എന്താണെന്ന് സ്വാമിയുടെ വാക്കുകളില്തന്നെ വ്യക്തമാക്കണമെന്ന് ടി കെ മാധവന് അഭ്യര്ഥിച്ചപ്പോള് ഗുരുദേവന് തന്റെ ഗൃഹസ്ഥശിഷ്യന്റെ ആ അഭ്യര്ഥന സ്വീകരിച്ച് അതിന് മറുപടിയെന്നോണം നടത്തിയ ഹ്രസ്വമായ ഒരു പ്രസംഗമാണിത്.
ഗുരുദേവന് പ്രസംഗിക്കുകയെന്നത് അപൂര്വത്തില് അപൂര്വമായ കാര്യമാണ്. എസ്എന്ഡിപി യോഗത്തിന്റെ വാര്ഷികയോഗങ്ങളില് അധ്യക്ഷപദം അലങ്കരിക്കുമ്പോള്പ്പോലും തന്റെ ശിഷ്യന്മാരെക്കൊണ്ട് പ്രസംഗിപ്പിക്കുകയായിരുന്നു പതിവ്. സമൂഹത്തിന്റെ മേല്ഗതിക്കും അധഃസ്ഥിതരുടെ സദ്ഗതിക്കും വേണ്ട ഉപദേശങ്ങളും സന്ദേശങ്ങളും കാലാകാലങ്ങളില് നല്കിയ ഗുരുദേവന് പലപ്പോഴും നര്മഭാഷണങ്ങളിലൂടെയാണ് സമൂഹത്തെ ചികിത്സിച്ചിരുന്നത്.
മഹാത്മാഗാന്ധി, സ്വാമി ശ്രദ്ധാനന്ദജി, സഹോദരന് അയ്യപ്പന്, സി വി കുഞ്ഞുരാമന് തുടങ്ങിയവര് ഗുരുദേവനുമായി നടത്തിയ സംഭാഷണങ്ങള് പരിശോധിച്ചാല് ഗുരുവിന്റെ ജാതിമതദൈവസങ്കല്പ്പങ്ങളിലേക്ക് പ്രവേശിക്കാനുള്ള വഴി തെളിഞ്ഞുകിട്ടും. പക്ഷേ, ഇതെല്ലാംതന്നെ ഉണ്ടായിട്ടും ഗുരുവിനെയും ഗുരുവചനങ്ങളെയും ഇന്നും ജാതിമയമായി കണ്ട് വാദിക്കുകയും പ്രവര്ത്തിക്കുകയും ചെയ്യുന്നവര് ചുറ്റിലുമുണ്ടെന്നതാണ് നമ്മെ ഏറെ വിഷാദിപ്പിക്കുന്നത്. അത്തരക്കാര് ഗുരുവിന്റെ ജാതിയില്ലാവിളംബരത്തെ കേട്ടതായിപ്പോലും നടിക്കാറില്ല. ജീവന്റെ മഹത്വമറിയാതെ മാംസത്തിന് വിലയിടുന്ന കശാപ്പുകാരനെപ്പോലെ ഗുരുവചനങ്ങളെ കാണുന്നവര്ക്ക് ഒരിക്കലും അതിന്റെ അരുളും പൊരുളും വിവേചിച്ചറിയാനാകില്ല.
ഗുരുദേവന് ജീവിതകാലം മുഴുവന് ചിന്തിച്ചതും പറഞ്ഞതും പ്രവര്ത്തിച്ചതും മനുഷ്യരാശിയുടെയാകെ ഭൌതികവും ആത്മീയവുമായ അഭ്യുന്നതിക്കും നിഃശ്രേയസ്സിനുമാണ്. "മനുഷ്യന് ജാതിയില്ല എന്നു നാം പറഞ്ഞതായി എഴുതിവയ്ക്കണം. ജാതി ഉണ്ടെന്ന വിചാരം പോകണം. അതാണു വേണ്ടത്'' എന്നുപദേശിച്ച ഗുരുവിന്റെ ഈ ജാതിരഹിതവിളംബരവും പ്രസംഗവും ഈ നൂറ്റാണ്ടിന്റെ വിജ്ഞാപനമായി കാണുവാന് ചരിത്രകാരന്മാര്ക്കും സാമൂഹ്യോദ്ധാരണപ്രവര്ത്തകര്ക്കും കഴിയണം. ഈ ഗുരുവാണികളെ അതിന്റെ ശതാബ്ദിവര്ഷത്തില് എല്ലാ മനുഷ്യഹൃദയങ്ങളിലേക്കും എത്തിക്കാനുള്ള പ്രയത്നത്തിലും പ്രചാരണത്തിലുമാണ് ശിവഗിരിമഠം *
(ശിവഗിരിമഠം ഗുരുധര്മപ്രചാരണസഭ സെക്രട്ടറിയാണ് ലേഖകന്) |
| You are subscribed to email updates from ഗുരുദേവ ചരിത്രം. To stop receiving these emails, you may unsubscribe now. | Email delivery powered by Google |
| Google Inc., 1600 Amphitheatre Parkway, Mountain View, CA 94043, United States | |
💐ഭഗവാൻ്റെ മഹാസമാധിമന്ദിരം💐
പ്ലാൻ തയാറാക്കിയത് ശ്രീ കെ എൻ . കൃഷ്ണപിള്ള ശ്രീനാരായണപരമഹംസദേവരിൽ അത്യന്തം ഭക്തി വിശ്വാസമുള്ള ഒരാളായിരുന്നു. കാശി സ്വാമികൾക്ക് ഇംഗ്ലിഷ് അറിയാമായിരുന്നു. ശിലാസ്ഥാപന കർമ്മത്തിനു ശേഷം അദ്ദേഹം കാശി സ്വാമികളുമായി പരിജയപ്പെട്ടപ്പോൾഈ ബ്രഹ്മ് വിദ്യാമന്ദിരം ഒരു സമാധി മന്ദിരമായി പരിണമിക്കുമെന്ന് കാശി സ്വാമികൾ അഭിപ്രായപ്പെട്ടു.ഇത് കേട്ടപ്പോൾ അടുത്ത് സമാധി ഉണ്ടാകുമേ എന്നു പരിഭ്രാന്തിയോടുകൂടി കൃഷ്ണപിള്ള ചേദിച്ചു. "" അടുത്തുണ്ടാകുകയില്ല" ഉണ്ടാകുമ്പോൾ അപ്രകാരമേ നടക്കു എന്ന് കാശി സ്വാമികൾ മറുപടി പറയുകയുംചെയ്തു.
ഇദ്ദേഹം പ്രവചിച്ച മാതിരി തന്നെ സംഗതികൾ നടന്നു. ശ്രീനാരായണ പരമഹംസദേവൻ്റെ മഹാസമാധിക്കു ശേഷം മന്ദിര നിർമ്മാണം ദീർഘകാലം വിഘ്നപ്പെട്ടു കിടന്നു. ബ്രഹ്മ വിദ്യാമന്ദിരംസമാധി മന്ദിരമായി രൂപാന്തരപ്പെട്ടപ്പോൾ സ്വാമി തൃപ്പാദങ്ങളുടെ പ്രായത്തെഅടിസ്ഥാനമാക്കി എഴുപത്തിമൂന്നടി ഉയരത്തിൽ അഞ്ച് നിലകളോടുകൂടിയ ഒരു മന്ദിരത്തിനുള്ള പ്ലാൻ മദ്രാസിലെ പ്രസിദ്ധ ആർക്കിടെക്ടായ ശ്രീ ചിറ്റാലയെക്കൊണ്ട് തയ്യറാക്കിച്ചു. അടിസ്ഥാനവും പ്ലാനുമെല്ലാം ഭഗവാൻ കൽപ്പിച്ചതു പോലെ തന്നെ. പക്ഷേ മുകൾ ഭാഗത്ത് ദ്രാവിഡ ക്ഷേത്രത്തി ശിൽപ്പത്തിൻ്റെ മാത്യകയിൽ കുറെ ഭേദഗതികൾ വരുത്തി. ഒരുബ്രഹ്മവിദ്യാമന്ദിരവും ഒരുമഹാഗ്രന്ഥശാലയുംഇതോടുചേർത്തുപണിയാൻ തീരുമാനിച്ചു...
മന്ദിരനിർമ്മാണ പ്രവർത്തനം നിരാശതാജനഗമായി ദീർഘകാലം വിഘ്നപ്പെട്ടുകിടക്കുന്നത് കൊണ്ട് അതിൻ്റെ പ്രോൽസാഹനത്തിനായി ആ മന്ദിരത്തിൻ്റെ ഫൗണ്ടേഷനും ബേസ് മെൻ്റും സ്വന്തം ചിലവിൽ ചെയ്യിക്കാമെന്നു സ്വാമി ഭക്തനും ഷൊർണ്ണർ സ്വദേശിയുമായ "ശ്രീ.എം പി.മൂത്തേടത്ത് ഏറ്റു. ഇരുപതിനായിരം രൂപ കൊണ്ട് ഇത് നിവർത്തിക്കാമെന്നു വിചാരിച്ചുപണി തുടങ്ങിയപ്പോൾ ആ തുകയുടെ അഞ്ചിരട്ടി അതിനു വേണ്ടി മാത്രം വേണ്ടിവരുമെന്ന് മനസ്സിലായി. ഏറ്റ സംഗതി ശ്രീനാരായണ പരമഹംസദേവൻ്റെ അനുഗ്രഹത്താൽ നിറവേറുമെന്നുള്ള വിശ്വാസത്തിൽ സധൈര്യം പ്രവർത്തിച്ചു തുടങ്ങിയപ്പോൾ അദ്ദേഹത്തിന് പുതിയ കൺട്രാക്റ്റുകൾ മൂലം കൂടുതൽ പണ സൗകര്യം ലഭിച്ചു.അതിനാൽ അടി നില മുഴുവനും സ്വന്ത ചിലവിൽ തീർപ്പിക്കാമെന്നു പിന്നീട് തീർച്ച ചെയ്തു. അടിനില പൂർത്തിയായതോടു കൂടി മൂത്തേടത്തിൻ്റെ സാമ്പത്തികനില കൂടുതൽ അഭിവൃദ്ധിപ്പെട്ടു വന്നതിനാൽ രണ്ടാമത്തെ നിലയും സ്വന്തം ചിലവിൽ ചെയ്യിക്കാമെന്നുറപ്പിച്ചു.അതും പൂർത്തിയായതോടു കൂടി അദ്ദേഹത്തിൻ്റെ ധനസ്ഥിതി പിന്നെയും കൂടുതൽ ശോഭനമായിക്കൊണ്ടിരുന്നു. തൻ്റെ ധനമെല്ലാം ഭഗവാൻ്റെ ധനമായി ഗണിച്ചു. സ്വാമി ഭക്തനും ധർമ്മ തൽപ്പരനുമായ അദ്ദേഹം സമാധി മന്ദിരം മുഴുവനും തൻ്റെ സ്വന്തം ചിലവിൽ പണികഴിപ്പിക്കാമെന്ന് തീർച്ച ചെയ്തു .അപ്രാകാരം എത്രയേലക്ഷം രൂപ ചിലവ് ചെയ്തു മഹാസമാധി മന്ദിരം പൂർത്തിയാക്കി. അതിൻ്റെ മേനി പണികളും ലൈറ്റ് മുതലായ സജ്ജികരണങ്ങളും താഴിക കുടങ്ങൾക്കുള്ള സ്വർണ്ണ വേലകളും ചെയ്തു. മുഴുവൻ ജോലികളും പൂർത്തിയാക്കിഅതിനുള്ളിൽ ശ്രി നാരായണപരമഹംസദേവൻ്റെ മനോഹരമായ ഒരു മാർബിൾ വിഗ്രഹം കൂടി ശ്രീ മുത്തേടത്തിൻ്റെ ചെലവിൽ സ്ഥാപിച്ചു.
സ്വാമി തൃപ്പാദങ്ങളുടെകൽപ്പന അനുസരിച്ച് ഒരു മഹാഗ്രന്ഥശാലയും ഒരു ബ്രഹ്മ വിദ്യാമന്ദിരവും കൂടി സ്ഥാപിച്ചു അതെല്ലാം ശ്രീ നാരായണ ധർമ്മസംഘം ട്രസ്റ്റിൻ്റെ ചുമതലയിൽ നടന്നവയാണ്.ഈ പുണ്യസ്ഥാനം ജനഹൃദയങ്ങളിൽ വെളിച്ചം വീശുന്ന ഒരു മഹൽ പ്രസ്ഥാനമായി ഇന്ന് ശോഭിക്കുന്നു..💐💐💐
നാനാജാതി മതസ്ഥരെ കരുണായാലേകീകരിച്ചിടുവാൻ മാനത്തോടെഴുപത്തിമൂന്നു സമകൾ നന്നായ് ശ്രമിച്ചാദരാൽ ദീനന്മാർക്കൊരു ദൈവമായ് ശിവഗിരിക്കുന്നിൻ സമാധി സ്ഥനാം ശ്രിനാരായണ ദേവ ചെങ്കഴിലിലീ തൃക്കാഴ്ചവയ്ക്കുന്നു ഞാൻ
❗ഗുരുധർമ്മപ്രചരണാർത്ഥം❗
ഗുരുസ്മൃതി ഗ്ലോബൽ വിഷൻ ടീം
|
|
Posted: 18 May 2016 01:52 AM PDT
🌱ജാതി അറിയാൻ🌱
മദ്ധ്യ തിരുവിതാംകൂറുകാരായ മൂന്ന് ഈഴവ പ്രമാണികൾ ഒരിക്കൽ ശിവഗിരിയിൽ വന്നു. അവരിൽ ഒരാൾ ഒരു പണിക്കൻ കൂടിയായിരുന്നു. തൃപ്പാദങ്ങളുമായി സംസാരിച്ചിരിക്കുന്നതിനിടയിൽ പണിക്കർ പറഞ്ഞു. എന്തൊക്കെയായാലും ശരി ഒരുത്തൻ്റെ മുഖത്തു നോക്കിയാൽ അവൻ്റെ ജാതി അറിയാം.
സ്വാമി : അതെങ്ങനെ അറിയാം?
പണിക്കൻ : എങ്ങനെയെന്നു പറയാനാവില്ല. കണ്ടാൽ അറിയാം
സ്വാമി : അതുശരിയാണോ ?
സ്വാമികൾ മറ്റുള്ളവരുടെ അഭിപ്രായം ആരാഞ്ഞു.
അവർ ഒന്നും പറഞ്ഞില്ല. അക്കാര്യം അങ്ങനെവിട്ടു. സംഭാഷണം തുടർന്നു. അല്പം കഴിഞ്ഞപ്പോൾ വെളുത്ത ദൃഢഗാത്രനായ ഒരു കോമള യുവാവ് ആ വരാന്തയിലേക്കു സവിനയം കയറിവന്ന് എരിഞ്ഞു തീർന്ന ചന്ദന തിരിയുടെ സ്റ്റാൻഡ് എടുത്തു കൊണ്ട് അകത്തേക്കു പോയി അല്പം കഴിഞ്ഞു പുകയന്ന കുറെ തിരികളുമായി അതു പൂർവ്വ സ്ഥാനത്തു കൊണ്ടു വച്ചു.
തൃപ്പാദങ്ങൾ പണിക്കനോട് : ഇവൻ ഏതു ജാതിയാണ്???
പണിക്കൻ : നായരാണ്
തൃപ്പാദങ്ങൾ : നായരാണെന്നേ തോന്നുള്ളു. അല്ലേ???
പണിക്കൻ : അതേ.
ആ വിഷയം പിന്നെ തുടർന്നതുമില്ല.
സംഭാഷണാനന്തരം വൈദിക മഠത്തിൽ നിന്നു താഴോട്ടിറങ്ങുമ്പോൾ ടിയാൻ എന്നോടു ചോദിച്ചു. ആ ചാമ്പ്രാണിത്തിരി കത്തിച്ചു വച്ച പയ്യൻ ഏതു ജാതിക്കാരാനാ, പിള്ളേ?" പറയ സമുദായത്തിൽപ്പെട്ട ആളാ കാർന്നോരെ ഞാൻപറഞ്ഞു. മൂപ്പിന്നു പിന്നെ ഒന്നും പറഞ്ഞില്ല ജ്വലിച്ച കൺകൊണ്ടൊരുനോക്കു നോക്കിയിട്ടു ധൃതിയിൽ ഇറങ്ങിപ്പോയി. കുറേ നാൾ പറയ സമുദായത്തിൽപ്പെട്ട ഒരാൾ തൃപ്പാദങ്ങളുടെ പാചകക്കാരാനായിരുന്നിട്ടുണ്ട്. അയാളാണു ചന്ദന തിരി കൊളുത്തി വച്ചത്.
📚ഗ്രന്ഥം : നാരായണ ഗുരു സ്മരണകൾ
📝ഗ്രന്ഥകാരൻ : പഴമ്പള്ളി അച്ചുതൻ |
|
Posted: 18 May 2016 01:51 AM PDT
കുറച്ച് വര്ഷങ്ങള്ക്ക് മുമ്പ് ഈജിപ്റ്റിനടുത്ത് ടുണീഷ്യ എന്ന രാജ്യത്ത് നിന്ന് ഒരു ഗ്രന്ഥം കണ്ടെത്തുകയുണ്ടായി.1950 ല് രചിക്കപ്പെട്ട രിഹ്ലത്തുല് ഹൗലല് അര്ലി ( ഒരു ലോക സഞ്ചാരിയുടെ ആത്മകഥ ) എന്ന ഈ ഗ്രന്ഥം രചിച്ചത് ടുണീഷ്യക്കാരനായ നസറുദ്ദീന് മക്ദസി എന്ന മുസല്മാനായ ലോകസഞ്ചാരി ആയിരുന്നു.7 ഭാഗങ്ങളായി പ്രസിദ്ധീകരിച്ച ഈ ബൃഹത് ഗ്രന്ഥത്തില് സവിസ്തരം പ്രതിബാധിക്കുന്നത് കേരളത്തില് വിരാജിച്ച ഒരു മഹാത്മാവിനെ പറ്റിയാണ.് അത് മറ്റാരുമല്ല ശ്രീനാരായണ ഗുരുസ്വാമി തൃപ്പാദങ്ങളാണ്.
സഞ്ചാരപ്രിയന് ആയിരുന്ന നസ്റുദ്ദീന് മക്ദസി 1945 കാലഘട്ടത്തില് ലോകസഞ്ചാരത്തിനായി പുറപ്പെട്ടു.പല മഹാനഗരങ്ങളും മഹാത്ഭുതങ്ങളും സന്ദര്ശിച്ച മക്ദസി ഇറാനില് എത്തി ചേര്ന്നു .ഇറാനില് സാധാരണ ജനതക്കിടയില് അദ്ദേഹം താമസിച്ചു.അവിടെ വച്ച് അവര് തങ്ങളുടെ പ്രാര്ത്ഥനാവേളയില് പേര്ഷ്യന് ഭാഷയില് എഴുതപ്പെട്ട ഒരു പ്രാര്ത്ഥന ചൊല്ലുന്നതായി മക്ദസി ശ്രദ്ദിച്ചു. ഈ പ്രാര്ത്ഥനയെപ്പറ്റി അന്വേഷിച്ച മക്ദസിക്ക് അറിയുവാന് സാധിച്ചത് ഭാരതത്തിലെ തിരുവിതാംകൂര്കാരനായ ഒരു സംന്യാസിവര്യന് രചിച്ച ആത്മോപദേശ ശതകം എന്ന കൃതിയുടെ പരിഭാഷയാണ് എന്നതാണ്. അവിടെ നിന്നും മക്ദസി തന്റെ യാത്ര തുടര്ന്ന് ഇറാഖില് എത്തി.അവിടെയും മക്ദസിക്ക് കേള്ക്കാന് സാധിച്ചത് തെരുവോരങ്ങളില് കൂടി പോലും കൊച്ചുകുട്ടികള് ഉള്പ്പെടെയുള്ള ജനത
അറബിഭാഷയില് പാടി നടക്കുന്ന ആത്മോപദേശ ശതകമാണ്.ഒാര്ക്കണം 1945 കാലഘട്ടത്തില് ഇന്നത്തെപ്പോലെ വാര്ത്താവിനിമയ സാധ്യതകള് ഇല്ലാതിരുന്നപ്പോളും കേരളം എന്ന ചെറിയ നാട്ടില് ജീവിച്ച ഒരു സാധു സംന്യാസിവര്യനാല് രചിക്കപ്പെട്ട ആത്മോപദേശ ശതകത്തിന്റെ വിശാലതയും വ്യാപ്തിയും.
മക്ദസിയുടെ മനസ്സില് ആത്മോപദേശം എഴുതിയ സംന്യാസിയെ നേരിട്ട് കാണണം എന്ന ആഗ്രഹം ഉദിച്ചു.കാരണം ഇത്രയും ഘാതം അകലെയുള്ള വ്യത്യസ്ത മതവിശ്വാസികളായ ജനത അവരുടെ ഭാഷകളില് ഒരു സന്യാസി എഴുതിയ കൃതി മനഃപാഠമാക്കണമെങ്കില് ഇത് എഴുതിയ വ്യക്തി നിസാരക്കാരനാവില്ല എന്ന് മനസ്സില് ഉറപ്പിച്ച് ശ്രീനാരായണ ഗുരുവിനെ കാണണം എന്ന ആഗ്രഹത്താല് ഭാരതത്തിലേക്ക് തിരിച്ചു.യാത്രാ മധ്യെ പാകിസ്ഥാനിലെ കറാച്ചിയില് എത്തിയ മക്ദസി അവിടുത്തെ ജനതയോട് കേരളത്തെപ്പറ്റിയും നാരായണഗുരുവിനെപ്പറ്റിയും അന്വേഷിച്ചപ്പോള് അത്ഭുതം ഉളവാക്കുന്ന വിവരങ്ങളാണ് ലഭിച്ചത്.1926 ല് ഉറുദ്ദു ഭാഷയില് കറാച്ചിയില് ഒരു പ്രസ്സില് ആത്മോപദേശ ശതകം അച്ചടിക്കപ്പെട്ടിരുന്നു.400 വരികളുള്ള ആത്മോപദേശ ശതകത്തിന്റെ 1 വരിയുടെ വ്യാഖ്യാനം രേഖപ്പെടുത്താന് ആനാട്ടിലെ സാഹിത്യകാരന്മാര്ക്ക് 24 പേജുകള് വേണ്ടിവന്നു..ദൈവഞ്ജാനത്തിന്റെ അപാരത എന്നാണ് മക്ദസിയോട് സാഹിത്യകാരന്മാര് ആത്മോപദേശ ശതകത്തെ പറ്റി വിശേഷിപ്പിച്ചത്.
മക്ദസി യുടെ സന്തോഷത്തിന് അതിരുകള് ഇല്ലായിരുന്നു.ഇത്രയും ശ്രേഷ്ഠനായ ഗുരുവിനെ നേരിട്ടു കാണുക തന്നെ വേണം എന്ന ആശയോടെ മക്ദസി കേരളത്തിലേക്ക് തിരിച്ചു.തമിഴ്നാട്ടിലെ ശിവാനന്ദ ആശ്രമത്തില് എത്തിയ മക്ദസി ഗുരുവിനെ അന്വേഷിച്ചു.അവിടുള്ള സന്യാസി നാരായണ ഗുരു കേരളത്തില് ജീവിച്ചിരുന്ന പൂര്ണ്ണ പുണ്ണ്യാവതാരമായിരുന്നുവെന്നും സ്വകര്മ്മത്താല് മാനവനെ പരിശോഭിതനാക്കിയ പുണ്യാത്മാവാണെന്നും1928 കന്നിമാസം 5ന് ഗുരു ശിവഗിരിയില് മഹാസമാധി പ്രാപിച്ചുവെന്നും മക്ദസിയെ അറിയിച്ചു.താന് തേടി വന്ന മഹാ ഗുരുവിനെ കാണുവാന് കഴിയാതെ പോയല്ലോ എന്ന ദുഖത്താല് സഞ്ചാരം മതിയാക്കി തിരികെ ടുണീഷ്യയിലേക്ക് തിരിച്ചു.മടക്കയാത്രയില് മക്ദസി ചിന്തിച്ചു , നാരായണ ഗുരു എന്ന മഹാത്മാവ് അവതാര പൂരുഷന് ആണെങ്കില് ഒരു യഥാര്ത്ഥ ഗുരു ആണെങ്കില് തനിക്ക് ഗുരു അത് വെളിവാക്കി തരുക തന്നെ ചെയ്യും.യഥാര്ത്ഥ ഗുരുവിനു മരണമില്ല അത് തനിക്ക് വെളിവാകുക തന്നെ ചെയ്യും.
പ്രീയരെ നസറുദ്ദീന് മക്ദസി തന്റെ ഗ്രന്ഥത്തില് രേഖപ്പെടുത്തി വച്ചിരിക്കുന്നു
ഒന്നല്ല ,രണ്ടല്ല ,മൂന്നല്ല പതിമൂന്ന് തവണ ശ്രീനാരായണ ഗുരു തനിക് നേരിട്ട് ദര്ശനം നല്കി തന്റെ സംശയങ്ങള്ക്ക് ഉത്തരം നല്കിഎന്ന്. ഇത് എഴുതിയത് ഒരു ഭാരതീയനോ ശ്രീനാരായണീയനോ അല്ല.മറിച്ച് ഈജിപ്റ്റിനടുത്ത ടുണീഷ്യക്കാരനായ മുസല്മാന് നസുറുദ്ദീന് മക്ദസിയാണ്.ലോകം കണ്ട മഹാസഞ്ചാരി കേരളത്തില് ജീവിച്ച് സമാധി പ്രാപിച്ച ശ്രീനാരായണ ഗുരുവിനെ 13 തവണ കണ്ട് അനുഭവിച്ചറിഞ്ഞ ആത്മസത്യം 7 ഭാഗങ്ങളുള്ള ഗ്രന്ഥത്തില് 5 ഭാഗങ്ങളിലൂം എഴുതിവച്ചിരിക്കുന്നു.' താന് ഈ ലോകത്ത് ലോകാത്ഭുതങ്ങള് ഒരുപാട് കണ്ടു എന്നാല് മഹാത്ഭുതം ഒന്നെയുള്ളു , അത് ജഗത്ഗുരു ശ്രീനാരായണ ഗുരു തൃപ്പാദങ്ങള് മാത്രമാണ്.'' എന്ന് മക്ദസി തന്റെ ഗ്രന്ഥത്തില് അടിവരയിട്ടു പറയുന്നു.
പ്രീയരെ ഒന്നോര്ക്കു , ശ്രീനാരായണ ഗുരു എന്ന മഹാനിധിയെ സ്വന്തമായി കിട്ടിയവരല്ലെ നമ്മള്.ലോകത്ത് അത്യപൂര്വ്വവും സമാനതകള് ഇല്ലാത്തതുമായ ഈ മഹാത്ഭുതത്തെ സ്വന്തമാക്കണ്ടവരല്ലേ നമ്മള്.ദൈവത്തെ അന്വേഷിച്ച് ,സത്യത്തെ അന്വേഷിച്ച് , ആത്മസുഖത്തെ അന്വേഷിച്ച് അലയേണ്ടവരല്ല നമ്മള്.കൈവന്ന നിധിയെ അറിഞ്ഞ് ആചരിച്ച് സ്വായത്തമാക്കുകയാണ് നമ്മള് ചെയേണ്ടത്..
നമിക്കുവിന് സഹജരെ നിയതമീ ഗുരുപാദം
നമുക്കിതില് പരം ദൈവം നിനക്കിലുണ്ടോ ഗുരുവര്യന് ഇതൂപോലെ ലഭിക്കുമോ കുലത്തിന് ഗുരുഭക്തിയില്ലാതാര്ക്കും കുശലമാമോ..
തൃപ്പാദസേവാംശി
രമേശ്. രവി |
|
Posted: 18 May 2016 01:50 AM PDT
❗സത്യവ്രതസ്വാമികൾ❗
🌕ജനനം : 26-03-1893
🌑സമാധി : 02-09-1926
〽ശ്രീനാരായണ ഗുരുദേവന്റെ വിവേകാനന്ദൻ എന്നറിയപ്പെട്ട സംന്യാസ ശിഷ്യൻ. ഗുരുദേവനിൽ നിന്നും പലവട്ടം ആത്മഗതം പോലെ പ്രശംസ ഏറ്റുവാങ്ങിയ ശിഷ്യനായിരുന്നു "സത്യവ്രതനെ നോക്കൂ സത്യവ്രതന് അശേഷം ജാതിചിന്തയില്ല; നമുക്കാർക്കും അത്ര ജാതിപോയിട്ടില്ലെന്നു തോന്നുന്നു": 1918-ൽ ഗുരുദേവൻ സിലോൺ സന്ദർശിച്ചപ്പോൾ സത്യവ്രതസ്വാമികളും ഒപ്പം പോയി. ശ്രീനാരായണ സിദ്ധാന്തങ്ങൾ, മത പരിഷ്ക്കരണം, ഏകമതം എന്നിങ്ങനെ വിവിധ വിഷയങ്ങൾ അദ്ദേഹം പ്രഭാഷണം നടത്തി. സിലോണിൽ വച്ചാണ് സത്യവ്രതൻ എന്ന നാമം ഗുരു നൽകിയത്. 1924 ആലുവയിൽ നടന്ന സർവ്വമതസമ്മേളനത്തിന്റെ പ്രധാന സംഘാകൻ സ്വാമികൾ ആയിരുന്നു. ആമുഖമായി സത്യവ്രതസ്വാമികൾ നടത്തിയ സ്വാഗതപ്രസംഗമാണ് സമ്മേളനത്തിന്റെ ജീവാത്മാവ്. വള്ളംകളി മത്സരത്തിന്റെ ആദ്യസംഘാടകൻ സ്വാമികളാണ്. ഇദ്ദേഹം 33-ാം വയസ്സിൽ സമാധിയായി. സത്യവ്രതസ്വാമികളുടെ സമാധിയറിഞ്ഞ ഗുരുദേവൻ ഇപ്രകാരം അരുളി "നമുക്ക് ക്ഷീണം തോന്നുന്നൂ. സത്യവ്രതൻ സത്യവ്രതനായി തന്നെ ജീവിച്ചു മരിച്ചു".〽
🗻സമാധി സ്ഥലം : ആനന്ദാശ്രമം, ചങ്ങനാശ്ശേരി
📚ശ്രീനാരായണ വചനാമൃതം
⭕ For More Updates
|
|
Posted: 18 May 2016 01:49 AM PDT
❗ചൈതന്യസ്വാമികൾ❗
🌕ജനനം : 27-03-1879
🌑സമാധി : 02-12-1953
〽വർക്കലയ്ക്കടുത്ത് പുരാതന നായർ തറവാട്ടിൽ ജനനം. നാരായണപിള്ള എന്നായിരുന്നു പൂർവ്വാശ്രമത്തിലെ പേര്. ആദ്യം ചട്ടമ്പിസ്വാമികളുടെ ശിഷ്യനായിരുന്നു. ഗുരുദേവനെക്കുറിച്ച് കൂടുതൽ അറിഞ്ഞപ്പോൾ തന്റെ ജീവിതം ആ സവിധത്തിലാണന്ന് നാരായണപിള്ള തീർച്ചയാക്കി. ചട്ടമ്പിസ്വാമികളുടെ അനുവാദത്തോടെ അരുവിപ്പുറത്തെത്തി. കണ്ടപാടെ ഗുരുവിന്റെ മൊഴികൾ "ജാതിയും മതവും ഗുരുശിഷ്യബന്ധത്തിനു തടസ്സമാവില്ല കൊള്ളാം"! ഈ ചൈതന്യ സ്വാമികൾ ആണ് 1917-ൽ ഗുരുദേവനെ പ്രത്യക്ഷ ദൈവമായിക്കണ്ട് "ഓം ശ്രീനാരായണ പരമഗുരുവേ" എന്നു തുടങ്ങുന്ന 108 മന്ത്രങ്ങളുള്ള ഗുരുപുഷ്പാജ്ഞലി മന്ത്രം രചിച്ചത്. ഗുരുദേവൻ ചൈതന്യസ്വാമികളെക്കുറിച്ച് പറഞ്ഞ് "ചൈതന്യത്തിനു കാവി വേണ്ട ചൈതന്യത്തിന്റെ പ്രവർത്തികൾ നമ്മുടേതാണ്".〽
🗻സമാധി സ്ഥലം : കണ്ണൂർ സുന്ദരേശ്വര ക്ഷേത്രം
📚ശ്രീനാരായണ വചനാമൃതം
⭕ For More Updates
|
|
Posted: 18 May 2016 01:47 AM PDT
🌷
〽കഴിഞ്ഞ 41 വർഷമായി ശിവഗിരി മഠം കേന്ദ്രമായി പ്രവർത്തിക്കുന്നു
ശിവഗിരി ബഹ്മ വിദ്യാലയത്തിലെ 7 വർഷ കോഴ്സിൽ പഠിച്ച് ബ്രഹ്മ വിദ്യാചാര്യഎന്നസ്ഥാനം.1976 ൽ ധർമ്മസംഘം ട്രസ്റ്റ് പ്രസിഡൻ്റ് ബ്രഹ്മാനന്ദ സ്വാമികളിൽ നിന്നും ബ്രഹ്മചര്യ ദീക്ഷയും 1982-ൽ ഗീതാനന്ദ സ്വാമികളിൽ നിന്നും സംന്യാസദീക്ഷയും സ്വീകരിച്ചു.ഇപ്പോൾ ധർമ്മസംഘം ട്രസ്റ്റ് ബോർഡ് അംഗം, ചാലക്കുടി ഗായത്രി ആശ്രമം, പേരാമ്പ്ര ശ്രീനാരായണ ഗുരു ചൈതന്യമഠം പ്രസിഡൻ്റ്.〽
〽ഗുരുസ്വരൂപം ആത്മോപദേശ ശതകത്തിൽ, ആശാൻ്റെ ഗുരുസ്തവ പഠനം, സത്യവ്രത സ്വാമികൾ, ഗുരുവിൻ്റെ വിവേകാനന്ദൻ, ശ്രിനാരായണ ശിവലിംഗം, ശ്രിനാരായണ നിശ്ചലാനന്ദം, ഗുരുദേവ ചരിത്രം അറിയപ്പെടാത്ത ഏടുകൾ, ഗുരുദേവ ചരിത്രം കണാപ്പുറങ്ങൾ, ഗുരുദേവൻ്റെ മഹാസമാധി, ഗുരു ചരണങ്ങളിൽ, ഗുരുദർശനം ആത്മോപദേശ
ശതകത്തിലൂടെ, ശ്രീനാരായണ ദർശനം 21-ാം നൂറ്റാണ്ടിൽ, യൂണിവേഴ്സൽഗുരു (ഇംഗ്ലിഷ് ), ഭഗവാൻ ശ്രീനാരായണഗുരുദേവ് തുടങ്ങിയ 25 ലധികം കൃതികൾ രചിച്ചിട്ടുണ്ട്.〽
〽ഏറ്റവും വലിയ ഗുരുധർമ്മ പ്രചാരകനുള്ള ശ്രീനാരായണ ക്ലബ് അവാർഡ്, (1987) ഗുരുധർമ്മ പ്രചാരകനുള്ള ഗുരുസ്മരണ അവാർഡ് (1991) ഗുരുസ്മൃതി അവാർഡ് പാല്യാത്തുരുത്ത്, ഗുരുവർഷം 150, പ്രമാണിച്ച്
ശ്രീനാരായണ ഭക്ത പരിപാലന യോഗം ഏർപ്പെടുത്തിയ ഏറ്റവും മികച്ച ശ്രീനാരായണിയൻ -സമഗ്ര സംഭാവന (2004) അവാർഡ്, തിരുവനന്തപുരം ശ്രീനാരായണ അക്കാഡമി അവാർഡ് (2006), കലാകേരളം അവാർഡ് (2007), എണാകുളം സേവസം ഘം അവാർഡ് കെ.ആർ.നാരായണൻ നാഷണൽ ഫൗണ്ടേഷൻ്റെ സമാധാനത്തിനുള്ള അവാർഡ് (2016) തുടങ്ങി നിരവധി പുരസ്കാരങ്ങൾക്ക് അർഹനായി, ബ്രഹ്മ വിദ്യാലയം രജത ജൂബിലി ആഘോഷ കമ്മിറ്റി സെക്രട്ടറി, ശിവഗിരി തീർത്ഥാടന പ്ലാറ്റിനം ജൂബിലി ആഘോഷ കമ്മിറ്റി, സെക്രട്ടറി, ശ്രീ ശാരദാ പ്രതിഷ്ഠ ശതാബ്ദി ആഘോഷ കമ്മിറ്റി സെക്രട്ടറി, ദൈവദശകം രചനാ ശതാബ്ദി ആഘോഷ കമ്മിറ്റി സെക്രട്ടറി, തുടങ്ങിയ ആഘോഷ പരുപാടികളുടെ സംഘാട.കൻ, ഡൽഹിയിൽ 25 വിദേശ രാജ്യങ്ങളുടെ പ്രതിനിധികളെ പങ്കെടുപ്പിച്ചു കൊണ്ട് ലോക മത പാർമെൻ്റ് സംഘടിപ്പിച്ചു. ജനലക്ഷങ്ങളെ പങ്കെടുപ്പിച്ചു കൊണ്ട് ശ്രീനാരായണ ദിവ്യപ്രബോധന ധ്യാനയജ്ഞം ഇപ്പോൾ 336 ൽ പരം യജ്ഞങ്ങൾ പിന്നിട്ടിരിക്കുന്നു. കഴിഞ്ഞ 30 വർഷങ്ങൾക്കിടയിൽ ഇന്ത്യയിലെ പ്രമുഖ പട്ടണങ്ങൾ കേന്ദ്രികരിച്ച് 8500 ലതികം പ്രഭാഷണങ്ങൾ 2005, 2009, 2013, 2014, വർഷങ്ങളിൽ അമേരിക്ക സന്ദർശിച്ച് മത മഹായോഗങ്ങളിൽ പ്രഭാഷണം സിങ്കപ്പൂർ, ശ്രീലങ്ക, ഗൾഫ് രാജ്യങ്ങൾ എന്നിവടങ്ങളിൽ നിരവധി തവണ സന്ദർശിച്ച് പ്രഭാഷണങ്ങൾധ്യാനയജ്ഞ യോഗങ്ങൾ ,ശ്രീനാരായണ ഗുരുദേവക്ഷേത്രത്തിലെ മാസചതയം, ശിവഗിരി തീർത്ഥാടനത്തിനോടനുമ്പന്ധിച്ചുള്ള പിതാംബര ദീക്ഷ, ഗുരുദേവക്ഷേത്രങ്ങളിലെ പഞ്ചലോഹ വിഗ്രഹപ്രതിഷ്ഠ സംവിധാനം, ഗുരുദേവക്ഷേത്രത്തിലെ പ്രാർത്ഥന സംവിധാനം, എന്നിവയുടെ ഉപജ്ഞാതാവും സ്വാമികളാണ്. ശ്രീനാരായണദർശനത്തിൻ്റെ വ്യാഖ്യതാവും മുഖ്യ പ്രഭാഷകനുമാണ്സ്വാമികൾ.〽
🙏🏻വന്ദേ ഗുരു പരമ്പരാം🙏🏻
⭕ For More Updates
|
|
Posted: 18 May 2016 01:46 AM PDT
ഇദ്ദേഹം സ്വാമി ത്യപ്പാദങ്ങളുടെ ഒരു ഗ്രഹസ്ഥ ശിഷ്യനായിരുന്നു. 1062-ൽ വർക്കല തച്ചൻകോണത്തു ക്ഷേത്രത്തിലാണ് തൃപ്പാദങ്ങൾ ആദ്യം വന്ന് വിശ്രമിച്ചിരുന്നത്.അക്കാലത്ത് അളുകൾ കയറാതെ കിടന്നിരുന്ന ശിവഗിരിക്കുന്നിന്റെ മുകളിൽ ഒരു ദിവസം സ്വാമികൾ ഭക്തന്മാരുമായിച്ചെന്ന് അവിടെത്തെ പ്രകൃതി രമണീയത കണ്ടു. "നമുക്കിവിടെ വിശ്രമിക്കുവാൻ കൊള്ളാം. ഈ സ്ഥലം ഗവൺമെന്റിൽ നിന്നും പതിച്ചു വാങ്ങാം എന്ന് പnഞ്ഞു.സ്ഥലം പതിപ്പിച്ചു.ശിവഗിരി മഠവും മഹാസമാധി സ്ഥാനവും ഈ സ്ഥലത്താണ് സ്ഥിതി ചെയ്യുന്നത്.1087 -ലെ ശാരദ പ്രതിഷ്ഠാ കാലത്ത് കേശവൻ കൺട്രാക്റ്റർ ചെയ്ത പ്രയത്നത്തിന്റെ ഫലമായി പ്രതിഷ്ഠാ കമ്മറ്റിയിൽ നിന്നും ഒരു സ്വർണ്ണ മെഡൽ ഇദ്ദേഹത്തിന് സമ്മാനിക്കുകയും, സ്വാമി തൃപ്പാദങ്ങൾ ഒരു സ്വർണ്ണ മൊതിരവും പട്ടും നൽകുകയും ചെയ്തിട്ടുണ്ട്. 1123-ൽ 75 -മാത്തെ വയസ്സിൻ ഇദ്ദേഹം ദിവംഗതനായി
ഗുരു ചരണം ശരണം
|
|
Posted: 18 May 2016 01:43 AM PDT
ശ്രീനാരായണപരമഹംസദേവർ
ദീർഘകാലം ശിവഗിരിയിൽ താമസ്സിച്ചിരുന്നത് ഈ മഠത്തിലായിരുന്നു. ഇവിടം വൈദീക മഠം എന്ന് അറിയപ്പെടുന്നത്.
സ്വാമി തൃപ്പാദങ്ങൾ വൈദിക മഠത്തിൽ വിശ്രമിക്കുന്ന കാലഘത്തിൽ പ്രഭാതത്തിൽ തന്നെ വൈദിക മഠത്തിൻ്റെ വരാന്തയുടെ അങ്ങേഅറ്റം മുതൽ ഇങ്ങേഅറ്റംവരെ ഭക്തൻമാർ ഭഗവാനു സമർപ്പിക്കുന്ന കാഴ്ച്ച വസ്തുക്കൾ കൊണ്ട് നിറയുമായിരുന്നു. ഭക്തരുടെ എല്ലാ ആഗ്രഹങ്ങളും നിറവേറ്റിയാണ് തൃപ്പാദങ്ങൾ അവരെ എല്ലാംയാത്ര ആക്കീരുന്നത്. വൈദീക കർമ്മാനുഷ്ഠാനങ്ങൾ നിഷേധിക്കപ്പെട്ടിരുന്ന സമൂഹത്തിലുള്ളവർക്ക് വൈദിക കർമ്മങ്ങൾ പഠിക്കുന്നതിനുള്ള ഒരു പാഠശാല വൈദിക മഠം കേന്ദ്രീകരിച്ചു നടന്നു വന്നിരുന്നു.അതു കൊണ്ടായിരിക്കാം ഈ മഠത്തിന് വൈദിക മഠം എന്ന പേര് ഗുരുദേവനാൽനൽകപ്പെട്ടത്.
1922- ൽ മഹാകവി രവീന്ദ്രനാഥ് ടാഗോറും, ദിനബന്ധു സി. എഫ് ആൺട്രൂസ്സും 1925-മാത്മഗാന്ധി മുതലായ മഹാരഥൻമാർക്ക് തൃപ്പാദങ്ങൾദർശനം നൽകിയതും ഇവിടെവച്ചാരുന്നു.
മഹാകവി കുമാരനാശാൻ അവസാനംയാത്രമൊഴി ചൊല്ലാതെ തൃപ്പാദങ്ങളോടു വിട പറഞ്ഞതും ഈ സവിധത്തിൽ നിന്നുമാണ് .അതിനുപരി [1928-സെപ്ത ബർ- 20-] [1104 കന്നി -5 ന് ] ശ്രിനാരായണ പരമഹംസദേവർ മഹാസമാധിയിൽ വിലയം പ്രാവിച്ചതും ഈ സവിധത്തിൽ വച്ചാണ്.
ഭക്തജനങ്ങൾ മഹാസമാധികഴിഞ്ഞാൽ ശിവഗിരിയിൽ ഭഗവാൻ്റെ ഏറ്റവുംസാന്നിദ്യംഉള്ള ഇടമായികണക്കാക്കിഭകതി
പൂർവ്വംവൈദികമഠത്തിൽ ദർശനം നടത്തി നമസ്കരിച്ച് പ്രദിക്ഷണം വച്ചു പ്രാർത്ഥനാദികൾ ചെയ്തു വരുന്നു. ഇവിടെ തൃപ്പാദങ്ങൾ ഉപയോഗിച്ചിരുന്ന കട്ടിൽ, കസേര, കമണ്ഡലു. ഊന്നുവടി തുടങ്ങിയ ദിവ്യവസ്തുക്കൾ സൂക്ഷിച്ചിരിക്കുന്നു. ഭഗവാൻ മാത്രമാണ് ശരണം എന്ന് ഉറച്ച വിശ്വാസത്തോടെ എത്തുന്ന ഭക്തർക്ക് ഒരു നോട്ടംകൊണ്ടോ സ്പർശനംകൊണ്ടോ ഒരിറ്റുതീർത്ഥംജലത്തിനാലോ അവരുടെ എല്ലാദുഃഖങ്ങളും അകറ്റിയിരുന്ന അഭയ വരദായകനായ ശ്രീനാരായണ പരമഹംസദേവർ ഇന്നും തപ്ത മനസ്സരായ ഭക്തരുടെ ആശ്രയമായി ഇന്നും ഇവിടെ തിരു സന്നിധാനം ചെയ്യുന്നു. ഈ സ്വർഗ്ഗഭൂമിയുടെ പാവനതയെ ഉൾക്കൊണ്ടു കൊണ്ട് ഭഗവാൻ്റെ തിരുസന്നിധിയിൽ മൗനത്തിൻ്റെ പൂർണ്ണതയിൽ പ്രാർത്ഥന നിർഭരമായ മനസ്സോടെ നമസ്കരിക്കാം |
| You are subscribed to email updates from ഗുരുദേവ ചരിത്രം. To stop receiving these emails, you may unsubscribe now. | Email delivery powered by Google |
| Google Inc., 1600 Amphitheatre Parkway, Mountain View, CA 94043, United States | |
Jagath Guru Sree Narayana Gurudevan |
|
Posted: 11 Apr 2016 04:20 AM PDT
ഇ ക്ഷേത്രം സ്ഥിതിചെയ്യുന്നത് കോട്ടയം ജില്ലയിലാണ്.ഇടപ്പാടിയിൽ നിന്നും പൂഞ്ഞാറിലേക്ക് 15 കി.മി ദൂരമാണ് ഒള്ളത്. സമീപ സ്ഥലമായ ഇടപ്പാടിയിലെ (ഗുരുദേവൻ ആണ് ഇടപ്പാടിയിലെ ആനന്ദ ഷണ്മുഖ ക്ഷേത്ര പ്രതിഷ്ഠ നടത്തിയത്) പോലെ ഇ പ്രദേശത്തെ ഈഴവ സമുദായക്കാർക്ക് സ്വന്തമായി ആരാധനാലയമുണ്ടായിരുന്നില്ല .ഇടപ്പാടിയിലെ ജനങ്ങൾ സ്വന്തമായി ക്ഷേത്രം നിർമ്മിച്ചത് പോലെ പൂഞ്ഞാർകാർക്കും ഒരു ക്ഷേത്രം വേണമെന്നായി.ഇവിടുത്തെ ഈഴവ പ്രമാണിമാരിലെ പ്രമുഖർ മങ്കുഴി കുടുംബക്കാർ ആയിരുന്നു.ഇടപാടിയിൽ ഗുരുദേവൻ ക്ഷേത്ര പ്രതിഷ്ഠയ്ക്ക് വന്നതറിഞ്ഞ മങ്കുഴി തറവാട്ടിലെ പ്രമാണിമാർ ഇടപ്പാടിയിലെത്തി ഗുരുവിനെ വണങ്ങി പൂഞ്ഞാറിലെ ജനങ്ങള്ക്കും ആരാധിക്കുവാൻ ക്ഷേത്രം പ്രതിഷ്ടിച്ചു നല്കണമെന്ന് അഭ്യർഥിച്ചു.അന്നുതന്നെ ഗുരുടെവനും സംഘവും പൂഞ്ഞാറിലേക്ക് തിരിച്ചു.തൊട്ടടുത്ത ദിവസം തന്നെ പൂഞ്ഞാറിലും സുബ്രഹ്മണ്യനെ സങ്കല്പ്പിച്ചു പ്രതിഷ്ഠ കർമ്മംനിര്വ്വഹിച്ചു.....ഒരിക്കലും മാറാത്ത മഹാമനസ്കത !!! അതിനു കോടി പ്രണാമങ്ങൾ അർപ്പിച്ചാലും അധികമാകുന്നില്ല.
ഇ വേലിനു എന്ത് ശക്തി എന്ന് ചോദിച്ചുകൊണ്ട് അവിടുത്തെ ഏതോ അന്തേവാസി വേൽ നശിപ്പിച്ചു കളയുകയുണ്ടായി.അതിനെ തുടർന്ന് ക്ഷേത്ര ഭാരവാഹികൾക്കും,നാട്ടുകര്ക്കും ഒട്ടനവധി ദുരന്തങ്ങളും ബുദ്ധിമുട്ടുകളും അനുഭവിക്കേണ്ടതായി വന്നുകൊണ്ടിരുന്നു.തുടർന്ന് നാട്ടുകാര ചേർന്ന് ഗീതാനന്ദ സ്വമികളെയും,സച്ചിദാനന്ദ സ്വമികളെയും വരുത്തി പരിഹാര കർമ്മങ്ങൾ ചെയ്യിച്ചതിനു ശേഷമാണ് ഇന്നുകാണുന്ന അഭിവൃത്തികൾ എല്ലാം വന്നു ചേർന്നത് .
|
|
Posted: 11 Apr 2016 04:20 AM PDT
തമിഴ്നാട്ടിലെ ഭാവാനീശ്വര ക്ഷേത്രം
ഈറോഡിനു സമീപമുള്ള "ഭവാനി " എന്ന സ്ഥലത്ത് ഗുരുദേവൻ ഒരു ക്ഷേത്ര പ്രതിഷ്ഠ നടത്തി,പ്രതിഷ്ഠ കർമ്മം കഴിഞ്ഞു ഭഗവാൻ വിശ്രമിക്കുമ്പോൾ ഒരു ഭ്രാന്തനെയും കൊണ്ട് കുറെ ആളുകൾ ഭഗവാന്റെ സന്നിധിയിൽ എത്തി.ഭഗവാനു അയാളുടെ രോഗം ഭേദമാക്കുവാൻ കഴിയും എന്നാ ഉറച്ച വിശ്വാസത്തിലാണ് അവിടെ കൊണ്ട് വന്നത്.കൈകാലുകൾ ചങ്ങലക്കു ഇട്ടാണ് രോഗിയെ അവിടെ കൊണ്ടുവന്നത്.അയാൾ വേദന കൊണ്ട് പുളയുകയായിരുന്നു.കണ്ടയുടൻ തന്നെ ചങ്ങലകൾ അഴിച്ചു മാറ്റുവാൻ ഭഗവാൻ അവരോടായി പറഞ്ഞു.എന്നിട്ടും അവർ അറച്ചുനില്ക്കുകയായിരുന്നു.രോഗി അക്രമാസക്തനാകും എന്ന ഭയമായിരുന്നു ഏവർക്കും.ചങ്ങല അഴിച്ചപ്പോൾ അയാൾ വളരെ ശാന്തനായി കാണപ്പെട്ടു.ഭഗവാനെ ദർശിച്ച മാത്രയിൽ തന്നെ അയാളുടെ രോഗം ഭേദമായി.പിന്നീട് അയാൾ ശാന്തമായും,നല്ല കുടുംബ ജീവിതം നയിച്ചതായിട്ടാണ് അറിയപ്പെടുന്നത്.
|
| You are subscribed to email updates from ഗുരുദേവ ചരിത്രം. To stop receiving these emails, you may unsubscribe now. | Email delivery powered by Google |
| Google Inc., 1600 Amphitheatre Parkway, Mountain View, CA 94043, United States | |













